Qoǵamda senimsizdik týyndaǵan jaǵdaida jerdi jekemenshikke berý máselesin túbegeili sheshý óte qiyn. Mundai pikirdi QR Parlamenti Májilisiniń depýtaty, jer reformasy komissiiasynyń múshesi Aidos Sarym bildirdi, dep habarlaidy QazAqparat.
«Aýyl sharýashylyǵynda, jer máselesinde qordalanǵan, buǵan deiingi Jer komissiiasynan tys qalyp, sheshimin tappaǵan máselelerge qatysty naqty ustanymdar qabyldanyp jatyr. Biz, Parlament retinde úlken zańdar legin, atap aitqanda, Jer kodeksi men aýyl sharýashylyǵyna qatysty zańdarǵa ózgeristerdi kútip otyrmyz. Onyń ishinde, búgingi, buǵan deiingi 4-otyrysta, odan tys jumys toptarynda aitylǵan derekterdi alyp, Qudai qalasa zańdyq nemese tiisti normativtik-quqyqtyq sheshimge ainaldyrý isimen ainalysý kerek bolady. Munyń ishinde eń bastysy qoǵamdy ábigerge salǵan, másele týdyrǵan jerdi jekemenshikke berý jaiyna qatysty aitar bolsaq, búgingi kúni tolyq aqparat joq, jer qyrtysy egjei-tegjeili zerdelenbegen, qoǵam ishinde senimsizdik týyndaǵan jaǵdaida bul máseleni túbegeili sheshý qiyn dep esepteimin», - dedi Aidos Sarym atalǵan komissiianyń 5-otyrysynan keiin.
Onyń atap ótýinshe, sheshim qabyldaýshy Úkimet, Parlament deitin bolsaq, onda búgingi kúni syrttan kórsetilip jatqan qysymdy sanaǵa emes, kóńil-kúige baǵynǵan áreket dep baǵalaýǵa bolady.
«Sondyqtan ár tarapqa da sheshim qabyldaý úshin naqty, shynaiy aqparat qajet. Senimsizdikti joiýdyń bir ǵana joly – fakt. Shyn máninde bir-eki jyldyń ishinde jer kadastry ashylsa, qai jerdiń iesi kim ekeni kórsetilse, aldaǵy ýaqytta jaiylymdar qaitarylsa, pandemiiadan keiin ekonomikamyz kóterilip, áleýmettik máseleler sheshilip, halyqtyń eńsesi kóterilip jatsa, onda sol kezde jekemenshik máselesin kóterýge bolady. Sondyqtan jerdi jekemenshikke berýge qatysty moratoriidi 5 jylǵa sozý týraly máseleni Prezidentke usyný qajet. Bul - Prezident qabyldaityn úlken sheshim», - dedi Májilis depýtaty.
Eske sala keteiik, búgin Jer reformasy komissiiasynyń otyrysynda jer ielgine qatysty normalarǵa belgilengen moratorii merzimin 5 jylǵa uzartý týraly sheshim qabyldandy.
