Parlament Senaty Biýrosynyń músheleri Palatanyń 14 sáýirde ótetin otyrysynyń kún tártibin bekitti, dep habarlaidy "Ult aqparat".
Senattyń kezekti otyrysynda depýtattar «Qazaqstan Respýblikasynyń keibir zańnamalyq aktilerine balanyń quqyqtaryn qorǵaý, bilim berý, aqparat jáne aqparattandyrý máseleleri boiynsha ózgerister men tolyqtyrýlar engizý týraly» zań jobasyn qaraidy.
Bul qujat balalardy olarǵa qatysty kez kelgen zorlyq-zombylyqtan, onyń ishinde otbasylyq qatynastar, bilim berý jáne aqparat salalary boiynsha qorǵaý tetikterin jaqsartýǵa arnalǵan.
«Balalardy býllingten jáne kiberbýllingten qorǵaý - mańyzdy mindetterdiń biri. Bul zań jobasynyń keibir normalary qoǵamda qyzý talqylanǵanyn jaqsy bilemin. Kez kelgen zań jobasyn talqylaý kezinde halyqtyń osyndai belsendiligi úlken mańyzǵa ie. Qazirgi tańda senatorlar usynylǵan normalardy muqiiat zerttep, barlyq pikirdi eskerip, jumys istep jatyr. Basty mindet – balalardyń quqyǵyn qorǵaityn sapaly zań qabyldaý. Bul rette qoǵamnyń pikirin eleýsiz qaldyrýǵa bolmaityny sózsiz. Óitkeni zań jobasy «Halyq únine qulaq asatyn memleket» tujyrymdamasyna qaishy kelmeýi kerek», – dedi Máýlen Áshimbaev.
Sonymen qatar Biýro músheleri beisenbide ótetin jiynnyń kún tártibine Tótenshe jaǵdailar ministri Iýrii Ilinniń kóktemgi sý tasqyny boiynsha elimizdegi ahýal týraly baiandamasyn qosty.
Aita keteiik, ótken aptada senator Sergei Ershov osy taqyrypqa bailanysty depýtattyq saýal joldap, elimizdegi gidrotehnikalyq nysandardyń jartysyna jýyǵy apattyq jaǵdaida turǵanyna nazar aýdarǵan edi. Osyǵan orai Senat Spikeriniń bastamasymen aldaǵy Otyrysqa Tótenshe jaǵdailar ministrin shaqyrý jóninde sheshim qabyldandy. Sol arqyly senatorlar elimizde júrgizilip jatqan sý tasqynymen kúres jumystary týraly jáne aldaǵy ýaqytta mundai jaǵdaidyń qaitalanbaýy úshin qolǵa alynatyn sharalar jóninde tolyq aqaparat alýdy kózdep otyr.
