Qyzǵylt tústi Kóbeituz kóline kóligimen kirip ketken azamattyń fotosýreti áleýmettik jelide qyzý talqylanǵan bolatyn. Aqmola oblysynyń politsiia qyzmetkerleri ol júrgizýshini ustap, ákimshilik kodekstiń eki baby boiynsha jaýapqa tartty, dep habarlaidy "Ult aqparat".
Kóbeituzǵa kóligimen kirip ketken kólik iesiniń áreketine áleýmetti jeli qoldanýshylary ashýlanyp, tártip buzýshyny jazalaýdy talap etken edi.
«Aqmola oblysynyń politseileri jol talǵamaityn kóliktiń iesin men istiń mán-jaiyn anyqtaý úshin jedel-izdestirý sharalaryn júrgizdi. Qabyldanǵan sharalardyń nátijesinde tártip saqshylary Toyota Land Cruiser kóliginiń Nur-Sultan qalasyndaǵy jeke qurylys kompaniialarynyń birinde tirkelgenin anyqtady. Osy jyldyń 20 shildesinde jol talǵamaityn kóligimen 40 jastaǵy júrgizýshi Kóbeituz kóline kirip ketken», - dep habarlady Aqmola oblysy politsiia departamentiniń baspasóz qyzmetinen.
Osy jaǵdai boiynsha quqyq qorǵaýshylar tártip buzýshyny eki bap boiynsha ákimshilik jaýapkershilikke tartqan. Atap aitqanda ol ákimshilik kodekstiń 364-baby (Ortaq sý paidalaný qaǵidalaryn buzý) boiynsha eskertý jariialanyp, 434-babynyń II tarmaǵy boiynsha (Ortaq paidalanylatyn oryndardy lastaý) 5 AEK (13 890 teńge) aiyppul salyndy.
Osyǵan bailanysty politsiia qyzmetkerleri azamattardy sanitarlyq-epidemiologiialyq talaptardy saqtap, tabiǵatqa jaýapty túrde qaraýǵa shaqyrdy.
Sanitarlyq normalardy saqtaý maqsatynda Aqmola oblysynyń Politsiia departamenti Kóbeituzǵa baratyn eki avtojolǵa 20 shildeden bastap 3 mobildi beket ornatqan. Osylaisha tyiym salynǵan orynǵa kirý jáne shyǵý jaǵdailary baqylanbaq. Odan bólek politsiianyń qosymsha patrýldeý ekipajy kól jaǵasynda qadaǵalaý jumystaryn júrgizedi.
