"QazMunaiGaz" baspasóz qyzmeti
"QazMunaiGaz" jýyrda Astanada narazylyqqa shyqqan "BerÁli Mańǵystaý Sompany" mekemesiniń burynǵy qyzmetkerlerimen kelissóz jalǵasyp jatqanyn málimdedi, - dep habarlaidy "Ult aqparat".
Kompaniia baspasóz qyzmetiniń málimetinshe, 11 sáýirde Energetika ministrligi, Eńbek jáne halyqty áleýmettik qorǵaý ministrligi, "Samuryq-Qazyna" UÁQ AQ, "QazMunaiGaz" UK AQ ókilderi, sondai-aq 10 adamnan quralǵan "BerÁli" kompaniiasynyń belsendi toby kirgen arnaiy komissiia jumysyn bastaǵan. Búginge deiin komissiia 3 otyrys ótkizgen.
""BerÁli" kompaniiasynyń burynǵy qyzmetkerleriniń basty talaby – "Ózenmunaigaz" AQ shtatyna jumysqa ornalasý. Bastamashyl topqa bul sharttyń múmkin emestigi aityldy. Uiymǵa jumysqa kezekte 9 myń adam turǵany atap ótildi. Olar qabyldanǵan algoritmderge sáikes bastapqyda kommýnaldy kompaniialarda jumys isteidi. Ári qarai bos jumys orny paida bolǵanda kezek boiynsha "Ózenmunaigaz" AQ-qa jumysqa turady. Kelissóz júrgizýshilerdiń bul talaby qala turǵyndarynyń múddesi men quqyqtaryna qaishy keledi", - delingen habarlamada.
Satyp alý qyzmetin uzaq merzimge belgileý máselesi boiynsha QMG ókilderi "3+2" shemasymen kelisimshart jasasýǵa daiyn ekenin bildirdi. Ol boiynsha kelisimsharttar qosymsha 2 jylǵa uzartý quqyǵymen 3 jylǵa jasalatyn bolady.
"Jekelegen máseleler boiynsha "BerÁli"-niń burynǵy qyzmetkerleriniń talaptary ózgerdi: atap aitqanda, jerasty jóndeý jumystarynyń qosymsha kólemin "Burǵylaý" jáne "MunaiFildServis" jeke kompaniialaryna berip, "BerÁli"-niń burynǵy qyzmetkerlerin osy kompaniialarǵa jumysqa ornalastyrý múmkindigi aityldy. Alaida, aldyn ala kelissózderden keiin atalǵan kompaniialardyń basshylyǵy óz brigadalarynyń tolyq júktelmeýine bailanysty mundai qyzmet túrin kórsetýge qyzyǵýshylyǵy joqtyǵyn málimdedi", - dep tolyqtyrdy kompaniia.
Eńbekti qorǵaý jáne uiymdastyrý jaǵdailary, biryńǵai tariftik-biliktilik anyqtamasyn (BTBA) qoldaný jáne tender rásimderine qatysty máseleler boiynsha táýelsiz komissiia qurýdy memlekettik organ ókilderi qarastyrýǵa jáne komissiianyń kún tártibi men quramyn múddeli organdarmen keliskennen keiin jaýabyn berýge daiyn ekendikterin málimdedi.
Budan bólek, QMG ókilderi "BerÁli" kompaniiasynyń burynǵy qyzmetkerleriniń barlyǵyn osyǵan deiingi jalaqysy men áleýmettik paketin saqtai otyryp, konkýrs nátijesinde jeńimpaz bolǵan kompaniiaǵa jumysqa ornalastyrýǵa daiyn ekendigin rastady.
"Qazirgi ýaqytta joǵaryda atalǵan máselelerdi talqylaý jalǵasyp jatyr jáne taraptar qoldanystaǵy zańnamaǵa sai kelisimge qol jetkizýge múddeli", - delingen kompaniia saitynda.
