Búgin elordada ótken III respýblikalyq imamdar forýmynda Aqparat jáne qoǵamdyq damý ministri Dáýren Abaev imamdardyń jańa obrazyn qalyptastyrý máselesin kóterdi, dep habarlaidy QazAqparat.
«Dini basqarma qyzmetshileriniń joǵary bilimi men biliktigin arttyrǵan abzal. Memleket imamdarǵa qoldaý kórsetý úshin jyl saiyn Dini basqarmanyń qyzmetshilerin oqytyp keledi. Meshit imamdarynyń tapshylyǵyn sheshý maqsatynda biz «Nur-Múbarak» Mysyr islam mádenieti ýniversitetine «Islamtaný» mamandyǵy boiynsha memleket tarapynan granttardyń bólinýine kómek kórsetýdemiz. Osy jerde taǵy bir mańyzdy másele bar. Jasyratyny joq, halyq arasynda keide moldalar jumysyna kóńil tolmaýshylyq aitylady. El imamdardy Quran oqyp, janaza shyǵarýmen qosa, basqa da úlken isterdiń ainalasynda kórgisi keletindigin bildirip jatady. Sondyqtan, Dini basqarma imamdardyń jańa obrazyn qalyptastyrýy kerek dep sanaimyn», - dedi Dáýren Abaev.
Ministrdiń aitýynsha, halyq imamdardy jaqsylyq isterge jumyldyratyn, qaiyrymdylyq sharalaryna muryndyq bolatyn, qýanyshy men qaiǵysyn bólisetin, qaiyrly iske úndeitin sipatta tanyǵany jón.
«Sebebi istiń – sózge qaraǵanda áseri kúshtirek. Sondai-aq, Dini basqarmanyń áleýmettik jeliler men BAQ betterindegi aǵartýshylyq jumystaryn kúsheitý kerek. Sonymen birge, Dini basqarmanyń tikelei qyzmetine qatysty jeke azamattardyń suraqtaryn ashyq ári jyldam sheshý maqsatynda Múftidiń «Virtýaldy qabyldaý bólimin» ashýdy usynamyn. Bul azamattarǵa ártúrli destrýktivti kózderden teris málimet emes, Dini basqarmadan tekserilgen, durys aqparat alýyna múmkindik beredi. Bul bastamany júzege asyrýǵa Ministrlik tarapynan járdem kórsete alamyz. Jáne buǵan deiin kezdesýlerimizdiń birinde ózderińizge din taqyrybynda televiziialyq baǵdarlama ashý jóninde ýáde bergen edik, sol ýádemizdi oryndap, qazir «Qazaqstan», «Habar» arnalarynan «Iman ózegi», «Religiia segodnia» habarlary shyǵýda», - dedi ol.
Dáýren Abaev sóz sońynda QMDB qarjy qyzmetiniń ashyqtyǵyn qamtamasyz etý qajettigin atap ótti.
«Búginde bul maqsatta meshitterge azamattardyń qaiyrymdylyǵyn qabyldaýǵa arnalǵan elektrondyq terminaldardy qoiý jumystary bastaldy. Osy jumystardy basynda iri qalalardyń meshitterinde, keiinnen barlyq oblystyq, aýdan ortalyqtarynda jalǵastyrý qajet. Bul tásil halyq aldynda Dini basqarmanyń qarjy-sharýashylyq qyzmetiniń ashyqtyǵy men jariialylyǵyna senim týdyryp, bedeliniń artýyna múmkindik jasaidy dep esepteimin», - dedi ministr.
