Qazaqstan musylmandary dini basqarmasy barlyq 45 rásimdi ótkizýdiń biryńǵai standartyn bekitti. Bul týraly Aqparat jáne qoǵamdyq damý ministri Dáýren Abaev aitty, dep habarlaidy QazAqparat.
«Sońǵy ýaqytta bizdiń azamattardyń dinge bet buryp kele jatqanyn erekshe atap ótý kerek. Sondyqtan, azamattardy rýhani turǵyda tárbieleýde dinniń orasan zor rólin jasyrý – aqymaqtyq bolar edi. Osyǵan bailanysty, Qazaqstan musylmandary dini basqarmasynda, álbette, Islamdy barlyq baǵytta damytýdaǵy jumysty durys uiymdastyrýda úlken jaýapkershilik bar. Ol degenińiz – medresede oqytý, ártúrli rásimderdi durys ótkizý, qaiyrymdylyq jasaý, eń bastysy azamattarǵa kómek berý sekildi mańyzdy sharýalar. Alaida zaiyrly sanatqa óte otyryp, kel kelgen institýttyń tiimdi jumysy úshin árine, birneshe qaǵidatty ustaný kerek. Ol qaǵidattardyń biri – birkelkilik. Kúni keshe imamdar forýmynda birneshe mańyzdy qujat qabyldandy. Ol qujattar QMDB-nyń bul qaǵidatty jumysyn kúsheitýge baǵyttalǵan», - dedi Dáýren Abaev «Ashyq dialog» baǵdarlamasynda.
Ministrdiń aitýyna qaraǵanda, «Jeti rýhani tirek» atty musylmandardyń rýhani alańynda negizgi qundylyqtar bekitiledi.
«Ol – adamgershilik, patriottylyq, birlik, eńbeksúigishtik jáne t.b. Halyqpen jumys júrgizýde mine, osy qasietter negizgi baǵyttar bolmaq. Ekinshiden, bul – din qyzmetkerleri atqaratyn dini rásimderdiń reestri. Dini rásimder adamdardyń búkil ómir jolynda aldynan shyǵady. Búgingi taldaý jumystary kórsetip otyrǵandai, eldiń ártúrli óńirinde belgili bir rásimdi ótkizerde aitarlyqtai aiyrmashylyq bar. Sol sebepti, QMDB barlyq 45 rásimdi ótkizýdiń birkelki standartyn bekitti. Úshinshisi – dini laýazymdar reestri. Bul jerde áńgime laýazymdyq nusqaýlar, medrese tyńdaýshysynan Bas múftige deiingi aralyqtaǵy mindettemeleri týraly aitylyp otyr. Meniń oiymsha, bul – bizdiń elimizdegi dini qarym-qatynastardy júielendirýge baǵyttalǵan qujattar paketi. Jalpy, munyń bári de atalǵan saladaǵy jaǵdaidy jaqsarta túserine senemin», - dedi ol.
