Katar elinde fýtboldan klýbtar arasyndaǵy álem chempionatynyń jeńimpazy anyqtaldy, dep habarlaidy "Ult aqparat".
Búgin finalda Germaniianyń «Bavariia» jáne Meksikanyń «ÝANL Tigres» komandalary kezdesti. Oiyn barysy tartysty órbidi. Nemis fýtbolshylary tizgindi óz qolynda ustaýǵa tyrysty.
Birinshi kezeńde komandalar bir-biriniń qaqpasynan sańylaý taba alǵan joq. Ekinshi kezeńniń 59-minýtynda «Bavariia» oiynshysy Benjamen Pavar ashyq qalǵan qaqpaǵa dopty týra baǵyttady. Kezdesýde nemis klýby 1:0 esebimen basym tústi.
«Bavariia» budan buryn mundai jetistikke 2013 jyly qol jetkizdi. Ol joly finalda Marokkonyń «Radja» komandasyn 2:0 esebimen tize búktirgen edi.
Úshinshi oryn úshin saiysta Egipettiń «Al Ahli» jáne Braziliianyń «Palmeiras» komandalary negizgi jáne qosymsha kezeńde 0:0 esebimen teń aiaqtaldy. Penaltide egipettik fýtbolshylar 3:2 esebimen basym tústi.
Atalǵan dop dodasy 2000 jyldan beri turaqty túrde ótkizilip keledi. Búgingi kúnge deiin 16 márte uiymdastyryldy. Chempiondyq ataqqa Ispaniianyń «Real Madrid» 4, «Barselona» 3, Braziliianyń «Korintians» 2, «Internasonal», «San-Paýlý», Angliianyń «Liverpýl», «Manchester Iýnaited», Italiianyń «Milan» «Inter» jáne Germaniianyń «Bavariia» komandalary ie boldy.
2019 jyly «Liverpýl» komandasy jeńimpaz atanǵan bolatyn. Ótken jyly dop dodasy koronavirýs infektsiiasyna bailanysty ótkizilmei, biylǵa aýystyrylǵan bolatyn.
2021 jylǵy klýbtar arasyndaǵy álem chempionaty Japoniiada jeltoqsan aiynda ótkiziledi dep josparlanǵan.
