QR Senat tóraǵasy ári álemdik jáne dástúrli dinder kóshbasshylary sezi hatshylyǵynyń basshysy Máýlen Áshimbaev álemdik aýqymdaǵy ekologiialyq qater týraly pikir bildirdi, dep habarlaidy QazAqparat.
«Adamzat úshin ekologiia máselesi barǵan saiyn mańyzdy bolyp barady. Jahandyq jylyný jáne klimattyń ózgerýi endi teoriialyq másele ǵana emes, biz bárimiz sezinip otyrǵan shyndyq. Búgingi tańda parniktik gazdardyń kontsentratsiiasy sońǵy eki million jyldaǵy eń joǵary deńgeige jetip otyr jáne qorshaǵan ortaǵa tastalatyn shyǵaryndylardiń kólemi ósip jatyr. 1990 jyldan bastap kómirqyshqyl gazy shyǵaryndylarynyń álemdik kólemi 50% artty», - dedi Máýlen Áshimbaev sezd otyrysynda.
Onyń aitýynsha, ótken onjyldyq - tarihtaǵy eń jyly onjyldyq bolǵan
«Sonymen qatar, temperatýranyń 1 gradýsqa kóterilýi astyq túsiminiń shamamen 5% jáne odan da kóp paiyzǵa tómendeýine ákeledi. Temperatýranyń kóterilýi muzdyqtardyń erýine jáne teńiz deńgeiiniń joǵarylaýyna ákelip otyr. Ǵalymdardyń paiymdaýynsha, biz keri qaitpaityn núktege jaqyndadyq, sodan keiin joiqyn tabiǵi qubylystar tek jiilep, eń aýyr zardaptarǵa ákelýi múmkin», - degen Senat tóraǵasy klimattyń qubylýyn búkil múddeli taraptar kúsh biriktirgen kezde ǵana tejeý múmkin bolatynyn eske saldy.
«Mundai jaǵdaida barlyq múddeli taraptarǵa, eń aldymen, jaýapty saiasatkerlerge, azamattyq sektor ókilderine, rýhani jáne dini kóshbasshylarǵa kúsh-jigerdi biriktirý mańyzdy. Jahandyq syn-qaterler men qaýipterge birlesip qarsy turý, soǵystardan, qarýlanýdan, ekstremizmnen, tózbeýshilikten jáne násilshildikten azat álem qurý, planetamyzǵa birge qamqorlyq jasaý mańyzdy», - dep túiindedi Máýlen Áshimbaev.
