"QazMunaiGaz" UK AQ basqarma tóraǵasy Maǵzum Myrzaǵaliev 30 maýsymda Máskeýde "Transneft" JAQ prezidenti Nikolai Tokarevpen kezdesti, - dep habarlaidy "Ult aqparat" "QMG" AQ baspasóz qyzmetine silteme jasap.
"Taraptar Kaspii qubyr jelisi konsortsiýmynyń qazaqstandyq munaidy tasymaldaý jónindegi qyzmettiń ózekti máselelerin talqylady. Qazaqstan men Resei arasyndaǵy strategiialyq seriktestik úshin KQK jobasynyń mańyzdylyǵyna da toqtaldy. Myrzaǵaliev «Transneft» kompaniiasy qazaqstandyq munaidy tasymaldaý men tranziti salasyndaǵy QMG-nyń uzaq merzimdi jáne senimdi seriktesi ekenin atap ótti.
Kezdesýde birinshi jáne ekinshi jyljymaly ailaq qurylǵylary mańaiyn jarylǵysh zattardan tazartý boiynsha júrip jatqan jumystarǵa bailanysty KQK teńiz terminalyndaǵy qazirgi jaǵdaiyna airyqsha den qoiyldy.
Birinshi jáne ekinshi jyljymaly ailaq qurylǵylary akvatoriiasynda sý astyndaǵy qaýipti zattardy jete tekserý jáne kádege jaratý jumystaryn Reseidiń tótenshe jaǵdailar ministrligi osy jyldyń 15 maýsymnan beri júrgizip keledi. Úshinshi jyljymaly ailaq qalypty jumys istep tur. Bastapqyda minalardan tazartý jumystaryn maýsymnyń 25-ne deiin aiaqtaý josparlanǵan edi. Biraq aýa-raiynyń qolaisyzdyǵyna bailanysty osy jyldyń 5-shi shildesine deiin uzartyldy" - delingen habarlamada.
Kezdesý barysynda taraptarǵa ekinshi jyljymaly aimaq mańaiynda minasyzdandyrý jumystary aiaqtalýǵa jaqyn ekendigi, shildeniń 1-nen bastap munai qubyry eki ailaq arqyly jumys isteitini aityldy. Birinshi jyljymaly aimaq akvatoriiasyndaǵy qaýipti zattardy izdeý jumystary 2022 jyldyń 5 shildesine deiin aiaqtalady dep josparlanýda.
"QMG men «Transneft» JAQ basshylary osy jaǵdailarǵa qaramastan, KQK qazaqstandyq munaidy júk berýshilerdiń kestesine sai kidirissiz jóneltip jatqandyǵyn atap ótti.
Birinshi jáne ekinshi jyljymaly ailaq qurylǵylary mańaiyn jarylǵysh zattardan tazartý jumystarynyń barysy jaily pikir almasqannan keiin M.Myrzaǵaliev pen N.Tokarev jumystar ýaqytyly aiaqtalatynyna senim bildirdi. Sonymen qatar úsh ailaqtyń da turaqty jumys istep turýynyń mańyzdylyǵyna toqtaldy.
QMG men «Transneft» JAQ basshylary birlesken qyzmettiń barlyq aspektileri boiynsha eki kompaniia arasyndaǵy qatynastar dinamikasyna oń baǵa berdi jáne taraptar yntymaqtastyǵy ózara túsinistik pen seriktestikke negizdeletinin málimdedi" - delingen resmi aqparatta.
