Búgin elordalyq «Barys» qurlyqtyq hokkei ligasyndaǵy kezdesýinde syrt aidynda Magnitogrskiniń «Metallýrg» komandasyn jeńdi, dep habarlaidy "Ult aqparat".
Bul - «Barys» komandasynyń biylǵy qurlyqtyq hokkei ligasyndaǵy toǵyzynshy oiyny. Budan buryn elordalyq klýb Almaty qalasynda ótken eki kezdesýde de jeńiske jetti.
Aldymen Máskeýdiń «Spartagyn», odan keiin Cheliabiniń «Traktoryn» tize búktirdi.
Búgingi kezdesýde «Barys» hokkeishileri ózderine senimdi oinady. Alǵashqy bolyp esep ashty. Elordalyq hokkeishi Djessi Bleker 3-minýtta óz komandasyn alǵa shyǵardy.
Ekinshi kezeńde aidyn ieleri tarazy basyn teńestirýge umtyldy. Sóitip, olar degenine jetti. Qarsylastar qatarynan 22-minýtta Pavel Dorofeev mergendik tanytty.
Úshinshi kezeńde «Barys» hokkeishileri taǵy da eki shaiba soǵyp ketti. 50-minýtta Nikita Mihailis mergendigimen tanylsa, 51-minýtta Roman Starchenko qanjyǵasyn mailady. Nátijesinde búgingi kezdesýde «Barys» «Metallýrgten» 3:1 esebimen basym tústi.
Osylaisha, úshinshi oiyn qatarynan jeńiske jetken «Barys» týrnir kestesinde 12-orynnan 9-orynǵa kóterildi.
Elordalyq klýb endi 27 qyrkúiekte syrt aidynda Cheliabiniń «Traktor» komandasymen kezdesedi. Odan keiingi úsh oiyndy óz alańynda ótkizedi. Aldymen Qytaidyń «Kýnlýn Red Star» komandasymen kezdesse, odan keiin 3 qazanda Nijnii Novgorodtyń «Torpedo», 6 qazanda Cherepovetstiń «Severstal» klýbymen sheberlik baiqasady.
