بٷگٸن ەلوردالىق «بارىس» قۇرلىقتىق حوككەي ليگاسىنداعى كەزدەسۋٸندە سىرت ايدىندا ماگنيتوگرسكٸنٸڭ «مەتاللۋرگ» كومانداسىن جەڭدٸ, دەپ حابارلايدى "ۇلت اقپارات".
بۇل - «بارىس» كومانداسىنىڭ بيىلعى قۇرلىقتىق حوككەي ليگاسىنداعى توعىزىنشى ويىنى. بۇدان بۇرىن ەلوردالىق كلۋب الماتى قالاسىندا ٶتكەن ەكٸ كەزدەسۋدە دە جەڭٸسكە جەتتٸ.
الدىمەن مەسكەۋدٸڭ «سپارتاگىن», ودان كەيٸن چەليابٸنٸڭ «تراكتورىن» تٸزە بٷكتٸردٸ.
بٷگٸنگٸ كەزدەسۋدە «بارىس» حوككەيشٸلەرٸ ٶزدەرٸنە سەنٸمدٸ وينادى. العاشقى بولىپ ەسەپ اشتى. ەلوردالىق حوككەيشٸ دجەسسي بلەكەر 3-مينۋتتا ٶز كومانداسىن العا شىعاردى.
ەكٸنشٸ كەزەڭدە ايدىن يەلەرٸ تارازى باسىن تەڭەستٸرۋگە ۇمتىلدى. سٶيتٸپ, ولار دەگەنٸنە جەتتٸ. قارسىلاستار قاتارىنان 22-مينۋتتا پاۆەل دوروفەەۆ مەرگەندٸك تانىتتى.
ٷشٸنشٸ كەزەڭدە «بارىس» حوككەيشٸلەرٸ تاعى دا ەكٸ شايبا سوعىپ كەتتٸ. 50-مينۋتتا نيكيتا ميحايليس مەرگەندٸگٸمەن تانىلسا, 51-مينۋتتا رومان ستارچەنكو قانجىعاسىن مايلادى. نەتيجەسٸندە بٷگٸنگٸ كەزدەسۋدە «بارىس» «مەتاللۋرگتەن» 3:1 ەسەبٸمەن باسىم تٷستٸ.
وسىلايشا, ٷشٸنشٸ ويىن قاتارىنان جەڭٸسكە جەتكەن «بارىس» تۋرنير كەستەسٸندە 12-ورىننان 9-ورىنعا كٶتەرٸلدٸ.
ەلوردالىق كلۋب ەندٸ 27 قىركٷيەكتە سىرت ايدىندا چەليابٸنٸڭ «تراكتور» كومانداسىمەن كەزدەسەدٸ. ودان كەيٸنگٸ ٷش ويىندى ٶز الاڭىندا ٶتكٸزەدٸ. الدىمەن قىتايدىڭ «كۋنلۋن رەد ستار» كومانداسىمەن كەزدەسسە, ودان كەيٸن 3 قازاندا نيجنيي نوۆگورودتىڭ «تورپەدو», 6 قازاندا چەرەپوۆەتستٸڭ «سەۆەرستال» كلۋبىمەن شەبەرلٸك بايقاسادى.
