Elordalyq «Barys» qurlyqtyq hokkei ligasyndaǵy ekinshi oiynynda Habarovskiniń «Amýr» komandasyn qabyldady, dep habarlaidy QazAqparat.
Esterińizge sala ketelik, 1 qyrkúiekte biylǵy qurlyqtyq hokkei ligasy oiyndary jalaýyn kóterdi. «Barys» alǵashqy kezdesýin óz aidynynda Vladivostoktyń «Admiralymen» ótkizip, qarsylasyna 1:3 esebimen jol berdi.
Al «Amýr» dál sol kúni Novosibirde jergilikti «Sibir» komandasynan 1:2 esebimen jeńilip qaldy.
Sondyqtan búgingi kezdesý oiyn basynan tartysty órbidi. Esepti alǵash bolyp «Amýr» hokkeishileri ashty. Ony 18-minýtta Tomash Zagorna oryndady. Al ekinshi kezeńniń 25-minýtynda «Barys» hokkeishisi Anton Sagadeev tarazy basyn teńestirdi. Al 30-minýtta «Amýr» sapynan Igor Rýdenkov qaitadan óz komandasyn alǵa shyǵardy. «Barys» jigitteri 32-minýtta taǵy da tarazy basyn teńestirdi. Soǵylǵan shaiba Aleksei Makliýkovtyń enshisine jazyldy.
Sońǵy kezeńde aidyn ieleri oiyn tizginin birden qolǵa alýǵa tyrysty. Qarsylastar qaqpasy mańynda jii shabýyl uiymdastyrdy. Nátijesinde Qazaqstan komandasy sapynan Korban Nait gol soqty.
Aita keteiik, ol komanda quramyna biyl qosyldy. «Admiralmen» bolǵan kezdesýde de bir goldyń avtory atanǵan edi. Kanadalyq hokkeishi budan buryn Ulttyq hokkei ligasynda oiyn kórsetti. AQSh-tyń «Filadelfiia Flaiers», «Florida» jáne Kanadanyń «Kalgari» komandalarynyń namysyn qorǵady.
Osylaisha «Barys» klýby «Amýrdy» 3:2 esebimen tize búktirdi.
«Barys» endigi tórt oiynyn syrtta ótkizedi. Aldymen 8 jáne 9 qyrkúiekte Qytai astanasy - Beijiń qalasynda jergilikti «Kýnlýn Red Star» komandasymen eki kezdesýde aidynǵa shyǵady. Al 11 qyrkúiekte syrtta búgingi qarsylasy - «Amýrmen» kezdesse, 13 qyrkúiekte «Admiralmen» oinaidy.
