Qazaqstan halyq Assambleiasynyń eldegi birlik kúnine tikelei qatysy bar. Óitkeni bul konstitýtsiialyq organ - dostyq pen yntymaqtyń týyn kótergen ult pen ulystyń basyn biriktirýshi shańyraq. Onyń maqsaty da qazaq halqynyń toptastyrýshylyq rólin arqaý ete otyryp, qazaqstandyq patriotizm, Qazaqstan halqynyń azamattyq jáne rýhani-mádeni salasyn odan ári damytýǵa, básekege qabiletti ultty qalyptastyrý protsesinde respýblikadaǵy etnosaralyq kelisimdi qamtamasyz etý.
Sotsialistik zamanda ómir súrgen halyqtardyń qai-qaisysy da stalindik zorlyq-zombylyqtan, genotsid pen etnotsidten, saiasi qýǵyn-súrginnen aman qalmaǵanyn kóne tarih jaqsy biledi. Keńes úkimeti jyldarynda jekelegen partiia, jazyqsyz jalaǵa tap bolǵan el azamattary ǵana emes, birtutas halyqtar — senimsiz de satqyn ulttar qataryna kirip, tarihi atamekenderinen kúshtep jer aýdarylǵan-tyn.
Mine, búginde, Egemendiktiń aq tańy atqan shaqta Otanymyzǵa ár qily saiasatpen jer aýdarylyp kelgen diasporalardyń urpaqtary qazaq ultymen birge memlekettik-ulttyq saiasatty ázirleýge jáne júzege asyrýǵa, Qazaqstan Respýblikasyndaǵy qoǵamdyq-saiasi turaqtylyqty qamtamasyz etýge yqpal etýge kúsh saldy. Bul – Qazaqstan Respýblikasynyń Prezidentiniń jasap otyrǵan jaqsylyqtarynyń biri ekenin basa aitýymyz kerek.
Zorlyqpen keshirilgen halyqtar qiyn-qystaý zamanda qazaq dalasynan pana taýyp qana qoimai, san-qily qiynshylyqtyń tezinen ótip, ózderi jáne urpaqtary úshin ekinshi Otanyn tapty. Olar osy jerde ózderiniń ulttyq erekshelikterin saqtap, bizdiń halyqpen birge kópultty Qazaqstandy qurdy. Mine, sol ulttardan quralǵan biregei institýt elimizdegi barlyq etnos ókilderin ortaq maqsat-múddege uiystyryp, respýblikadaǵy turaqtylyqty saqtaý men el damýy jolyndaǵy bastamalarǵa aitýly úles qosyp keledi.
Sondyqtan qoǵamda diasporaaralyq kelisimdi jáne toleranttylyqty odan ári nyǵaitý úshin qolaily jaǵdai jasap, el birligin nyǵaityp, memleketqurýshy qazaq ultynyń dástúri men tilin dáripteý arqyly diasporalar mádenietiniń saqtalýyna úles qosyp, qoǵamdyq kelisimdi qoldap, sonymen qatar, memlekettik organdarǵa ekstremizm men radikalizm kórinisterine qarsy áreket etýge, azamattardyń demokratiia normalaryna negizdelgen saiasi-quqyqtyq mádenietin qalyptastyrýǵa kómek kórsetip júrgen bul iri uiymnyń el ómirindegi orny zor.
Endeshe, biz Qazaqstan halyq Assambleiasy keńesiniń Qazaqstan halqynyń birligi kúnine orai jariialaǵan quttyqtaýyn oqyrman qaýym nazaryna usynǵandy jón sanadyq.
"Qurmetti otandastar!
Qazaqstan halqy Assambleiasy Sizderdi Qazaqstan halqynyń birligi kúnimen shyn júrekten quttyqtaidy.
Jalpyulttyq birlik meiramynyń bizdiń elimiz úshin erekshe máni men mańyzdylyǵy bar.
Táýelsizdik jyldarynda qol jetkizgen barsha tabystarymyz ben jetistikterimiz – bul qazaqstandyq qoǵamda birlik pen kelisimdi nyǵaitýǵa baǵyttalǵan dáiekti saiasattyń nátijesi.
«Áralýandyq birligi» qaǵidasy kópetnosty jáne alýan mádenietti Qazaqstannyń negizi boldy.
Úilesimdi etnosaralyq qatynastardyń qundylyǵyn túsiný, yntymaqtastyq, ózara qoldaý jáne rizashylyq sezimi ómirimiz ben mádenietimizdiń ajyramas bóligi retinde qoǵamymyzda bekem ornyqty.
Búgin, áleýmettik memleket pen ulttyq igiliktiń jańa úlgisin qurý aiasynda bizdiń birligimiz jańa serpin aldy.
«Prezidenttiń bes áleýmettik bastamasy» – bul qoǵamnyń áleýmettik birliginiń, beibitshilik pen kelisimniń qazaqstandyq úlgisiniń aýqymdy tuǵyry.
Qurmetti qazaqstandyqtar!
Biz «Birligi joq eldiń – bolashaǵy joq» degen halyq danalyǵyna sáikes ómir súrip, Otanymyz – Qazaqstan Respýblikasyn nyǵaitýdamyz.
Biz – bir elmiz jáne jalǵyz Otanymyz bar. Árqaisymyzdyń taǵdyry - Qazaqstan taǵdyryna bailanysty.
Osy nur shashqan meiramda, biz barshańyzǵa zor densaýlyq, baqyt pen amandyq tileimiz! Osy kún bizdiń shańyraǵymyzǵa qýanysh pen shýaq ákelsin!
Qazaqstan halqy birliginiń kúnimen shyn júrekten quttyqtaýymyzdy qabyl alyńyzdar!
Týǵan jerimiz órkendep, elimiz órlei bersin!"
