Qazaqstan halqy Assambleiasynyń XXIX sessiiasynda «Táýelsizdik qyrandary» qoǵamdyq qorynyń atqarýshy direktory, kásipker Oljas Súleimen jastardy, kásipker bolyp, álemniń naryǵyn birge jaýlaýǵa shaqyrdy, dep habarlaidy QazAqparat.
«Qazaqta «Almas qylysh qyn túbinde jatpaidy» degen jaqsy sóz bar. Bizdiń elde talpynǵan, eńbektengen adamǵa jetistikke jetýge bolatynyna men tolyqtai senimdimin! Oǵan dálel retinde qarapaiym jetistikterimmen bólisýge ruqsat etińizder. Elimizdiń arqasynda aýyl balasynyń Qytai Halyq Respýblikasyndaǵy eń myqty ýniversitetterdiń birinde bilim alsam degen armany oryndaldy. Shetelde oqyp júrgen kezimizde, bizge qarap eldi synaityn bolǵandyqtan, 10 myńnan astam stýdenttiń basyn biriktiretin Qazaqstan stýdentter qaýymdastyǵyn qurdyq jáne de Shanhaidyń tórinen «Qazaqstan mádeniet ortalyǵyn» ashtyq. Toǵyz jyl aspan asty elinde turyp, oqýymdy aman-esen támamdap, «Elimdi qandai jańalyqpen qýantyp, tańqaldyrsam?» degen oida júrgenimde BUU uiymdastyrǵan «Kóp Tilder, Bir Álem» shyǵarmalar saiysyna qatystym», - dedi O. Súleimen.
Onyń aitýynsha, baiqaýda 130 memleketten 23 myńnan astam úmitker qatysqan dodada jeńiske jetti.
«BUU-da biik minberden sózimdi Sizden (Nursultan Nazarbaevtan) úlgi alyp, ana tilimde bastap, qazaq tilin álemge taǵy bir estirttim. BUU-da elimiz iadrolyq qarýdan bas tartqany úshin, erekshe qurmetke ie ekenine kózim jetti. Aýyldyń armanshyl balasy – shetten bilim alyp, halyqaralyq tájiribe jinap, aman-esen elge oraldym. Kelgen soń ministrdiń keńesshisi laýazymynda, taǵy basqa qyzmetterde bolyp, keiin kásipkerlikke bet burdym. Shet elde bilim alǵan dostarymmen birigip «Biz jumys izdemei, jumys ornyn ashaiyq» degen oimen ózimizdiń kompaniiamyzdy qurdyq. Qazirgi kezde kompaniiamyz joǵary deńgeide jumys istep, munai jáne blokchein salarynda halyqaralyq deńgeidegi kompaniialarmen básekege túsýde. Kásipker degenimiz – qazirgi kezdiń jaýyngeri dep oilaimyn. Sebebi, kásipkerlik úlken eńbek pen batyldyqty qajet etedi. Batyldyq pen batyrlyq qanymyzda bolǵan soń, elimizdiń jastary eshkimge táýeldi bolmai, kásipker bolyp, álemniń naryǵyn birge jaýlaýǵa shaqyramyn! Qazaq jigitteri bai-baqýatty el degende márt, atymtai jomart bolsa, elimiz budan da úlken jetistikterge jetetinine senimdimin», - dedi Oljas Súleimen.
