Elorda irgesindegi Kishi Taldykól mańaiynda júrip jatqan qurylys jumystary toqtatyldy, dep habarlaidy QazAqparat elordanyń qalalyq orta sapasy jáne baqylaý basqarmasyna silteme jasap.
Habarlamada aitylǵandai, astanalyq basqarma Kishi Taldykól mańynda qurylys salyp jatqan «SAT-NS» JShS jumysyna tekserý júrgizgen.
«Tekserý nátijesinde QR Ákimshilik quqyq buzý kodeksine sáikes, qurylys kompaniiasynyń qyzmetine qatysty birneshe ákimshilik hattama toltyryldy. Atap aitqanda, kodekstiń 463 baby 1 tarmaǵyna qatysty qurylys salý týraly habar bermegen. 316 bap boiynsha qurylystyń jobalyq-smetalyq qujaty saraptama talaptaryna sáikes kelmeidi. Jáne 316 bap boiynsha qurylysty tehnikalyq jáne avtorlyq qadaǵalaý súiemeldeýinsiz júzege asyrý. Sondai-aq, atalǵan zańbuzýshylyqtardy joiý jáne qurylys jumysyn toqtatý týraly uiǵarym shyǵaryldy», - delingen aqparatta.
Osy tusta aita ketetin jait, atalǵan qurylys kompaniiasynyń Nur-Sultan qalasy ákimdiginiń 2021 jylǵy 13 qyrkúiektegi № 510-3075 qaýlysyna sáikes Kishi Taldykól aýmaǵynda ónerkásiptik-azamattyq maqsattaǵy obektilerdi izdestirý jáne jobalaý jumysyn júrgizýge ruqsaty bar bolyp shyqty.
