Tótenshe jaǵdai engizý saldarynan kirisin joǵaltqan adamdarǵa tólenetin qarajat máselesi boiynsha Eńbek jáne halyqty áleýmettik qorǵaý ministriniń buiryǵy búgin shyǵady, dep habarlaidy QazAqparat.
«Buiryqta tótenshe jaǵdailar kezindegi áleýmettik tólemderdiń berilý erejesi kórsetiledi. Qaitalap aitamyz, bul tólemder Áleýmettik saqtandyrý memlekettik qorynan tólenedi», - dedi QR Aqparat jáne qoǵamdyq damý ministri Dáýren Abaev «Habar 24» arnasyndaǵy onlain rejimdegi baspasóz máslihatynda.
Dáýren Abaevtyń aitýynsha tólem 2 túrli bolady.
«Birinshiden, tótenshe jaǵdaiǵa bailanysty aqysyz eńbek demalysyna shyqqandarǵa - onyń kólemi aiyna 42 myń teńge. Bul usaq, shaǵyn jáne orta biznestiń qyzmetkerleri bolýy múmkin. Olar keiingi jyly memlekettik qorǵa 3 ret aýdarym jasaýy kerek. Qajetti ótinimdi jumysshy emes, jumys berýshi jasaidy. Ótinimdi aýdandyq jáne qalalyq jumyspen qamtý shtabtaryna berý kerek. Tólemder tótenshe jaǵdai aiaqtalǵansha júredi», - dedi ol.
Tólemderdiń ekinshi túri – jumystan shyǵyp qalǵandarǵa qatysty. Olar tólemderdi 1 aidan 6 aiǵa deiin alady.
«Tólemderdiń kólemi ailyqtyń 40% quraidy. Ótinim berýdiń esh qiyndyǵy joq. Jumyspen qamtý ortalyǵynda jumyssyz retinde tirkelip, aryz berý qajet. Aryzdy onlain berýge bolady», - dedi Dáýren Abaev.
