Qazaqstandyq kinoprodiýser Nurlan Qoianbaev Astana Media Week aptalyǵynda qazaqstandyq kinotýyndylardy kórsetý jóninde baiandady, dep habarlaidy QazAqparat.
«Kino salasynda jumys istep jatqanymyzǵa 4 jyl bolǵan joq, bul aralyqta kishigirim 3 kino túsirdik. Qazaqstandyq kórermenniń otandyq kinoǵa degen qyzyǵýshylyǵy ósip jatyr. Sońǵy eki jylda qazaqstandyq kinolar kórý jaǵynan Gollivýd kinolaryn qýyp jetti dep aitýǵa bolady. Qazaqstan kinoteatrlarynan kórsetilgen úzdik 5 kinonyń qataryna 2 qazaqstandyq kino endi. «Biznes po kazahskii» filminiń kassalyq túsimi 2 mln dollar tabys tapty. Ony eń úzdik dep otyrǵan joqpyn. Biraq, bul - kinoteatr túsimindegi qazaqstandyq kinonyń jeńisi», - dedi N. Qoianbaev «Qazaqstandaǵy kino men serialdy damytý» paneldik sessiiasynda.
Sonymen birge, prodiýser Úkimet tarapynan óner men kinony qoldaýdyń mańyzdylyǵyn atap ótti.
«Biznes po kazahskii» filminiń kezekti shyǵarylymyn Koreiada túsirip keldik. Ondaǵy áriptestermen sóileskende, Koreia memleketi áli kúnge deiin jeke kompaniialarǵa kómektesip jatqanyn aitty. Nátijesin de kórip otyrsyzdar, Ońtústik Koreianyń telehikaiasy, kinosy, mádenieti búkil álemge taraldy», - dedi ol.
Aita keteiik, elordadaǵy «Qazmedia» ortalyǵynda úsh kúnge sozylatyn Ortalyq Aziiadaǵy eń iri media-oqiǵa — Astana Media Week bastaldy.
Onda Aqparat jáne qoǵamdyq damý ministri Dáýren Abaev otandyq serial óndirýshilerge salyq jeńildigi týraly aitty.
