QR ekologiia, geologiia jáne tabiǵi resýrstar ministri Maǵzum Myrzaǵaliev Alakólge qonaqúilerdiń birinen lai sý aǵyzý deregine qatysty pikir bildirdi. Bul týraly ministr Twitter-degi paraqshasynda jazdy.
«Ministrlik mamandarynan quralǵan komissiia Alakólde qonaq úilerdiń biri basseinnen kólge sý aǵyzǵanyn anyqtady. Bul múldem orynsyz jaǵdai dep sanaimyn. Oqiǵa egjei-tegjeili zerttelip, kináliler jazalanatyn bolady. Tolyq aqparat jariialanady» delingen habarlamada.
Aita keteiik, buǵan deiin áleýmettik jeli paidalanýshylary Alakólge qubyr arqyly lai sý aǵyzylyp jatqanyn aityp dabyl qaqqan bolatyn.
Beinejazbaǵy málimetke sáikes, kólge tógilip jatqan sýdyń jaǵymsyz iisi bar.
Artynsha Alakól aýdanynyń ákimdigi bul máselege orai arnaiy komissiia qurylǵanyn jetkizdi.
