Jariialanǵan tótenshe jaǵdaiǵa bailanysty 42 500 teńge somasyndaǵy tólem el turǵyndaryna taǵaiyndalyp jatyr jáne osy tólemdi alǵandardyń sany kún saiyn artýda. Qazirgi ýaqytta bul qarajat Memlekettik áleýmettik saqtandyrý qorynan (MÁSQ) tólenip jatyr, dep habarlaidy QazAqparat.
Ótinimdi qandai resýrstar arqyly berýge bolady?
Tótenshe jaǵdai kezeńinde áleýmettik tólem alýǵa arnalǵan ótinimdi eGov portaly, 42500.enbek.kz saity jáne Help42500Bot Telegram-boty arqyly jiberý múmkindigi bar. Bul rette azamattar ótinim jiberý kezinde qajetti jeke málimetterin engizedi.
Azamattardyń jeke málimetterin tekserý men jiberilgen ótinimdi qarastyrý úshin 3 jumys kúni merziminde ýaqyt kerek. Osydan keiin Memlekettik áleýmettik saqtandyrý qorynda tólem jasaý týraly sheshim qabyldanǵannan soń, ótinim berýshige SMS-habarlama keledi. Keiinnen ótinish berýshiniń derekteri «Azamattarǵa arnalǵan úkimet» memlekettik korporatsiiasy» KEAQ-ǵa jiberiledi. Ol ony ekinshi deńgeidegi bankterge tólem júrgizý úshin baǵyttaidy.
Osy oraida mamandar ótinishterdi qaraý merziminiń ulǵaiýyna jol bermeý maqsatynda azamattardan ótinimdi bir ret qana jiberýdi surap otyr. Sebebi, azamattar ótinimdi birneshe qaitalap jibergen jaǵdailar da kezdesýde.
42 500 teńgeni kim alady?
Tótenshe jaǵdaidyń jariialanýyna bailanysty tabysynan aiyrylǵan kelesi sanattaǵy azamattar aiyna 42 500 teńge mólsherinde áleýmettik tólem alady:
–shaǵyn jáne orta kásipkerlik sýbektileriniń jalaqysy saqtalmaityn demalystaǵy qyzmetkerleri;
– karantin engizilgen eldi mekenderdegi iri kásipkerlik sýbektileriniń jalaqysy saqtalmaityn demalystaǵy qyzmetkerleri;
– memlekettik mekemelerdi qospaǵanda, kommertsiialyq emes zańdy tulǵalardyń jalaqysy saqtalmaityn demalystaǵy qyzmetkerleri;
– jeke kásipkerler;
– jeke praktikamen ainalysatyn adamdar (notariýs, jeke sot oryndaýshysy, advokat, kásibi mediator);
– biryńǵai jiyntyq tólemdi tóleýshiler bolyp sanalatyn jeke tulǵalar;
– nysanasy jumystardy oryndaý (qyzmetter kórsetý) bolyp tabylatyn azamattyq-quqyqtyq sipattaǵy sharttar boiynsha tabys tabatyn, salyq agentteri olar úshin mindetti zeinetaqy jarnalaryn aýdarǵan adamdar.
Ministr ne deidi?
Jaqynda QR Eńbek jáne halyqty áleýmettik qorǵaý ministri Birjan Nurymbetov qashyqtan jumys isteitin adamdar bul tólemdi ala almaitynyn túsindirdi.
«42 500 teńge resmi, beiresmi jumys istep júrgen, biraq tótenshe jaǵdai saldarynan tabysynan aiyrylǵan azamattarǵa qarastyrylǵan. Olar - jaldamaly qyzmetkerler, shaǵyn jáne orta biznestiń jumyskerleri. Eger jaldamaly qyzmetkerler májbúrli túrde, aqysy tólenbeitin eńbek demalysyna jiberilse nemese jumystan shyǵyp qalsa, atalǵan tólemdi alýyna bolady. Qashyqtan jumys isteitin adamdar bul tólemdi almaidy», - deidi ministr.
Sonymen qatar ol jaqynda buiryqqa qandai ózgeris engizilgenin aitty.
«Jaldamaly qyzmetshiler qataryna kommertsiialyq emes uiymdardyń da jumysshylary kiredi. Olar aqysyz demalysqa jiberilgen bolsa, atalǵan tólemdi ala alady. Memlekettik organdar, kvazimemlekettik uiymdarǵa bul tólem berilmeidi. Áleýmettik tólem beriletin kelesi top – óz betimen jumys istep júrgen jeke tulǵalar. Olardyń arasynda resmi jáne beiresmi jumyspen ainalysyp júrgender bar. Resmi jumys istep júrgender – jeke kásipkerler, advokat, notariýs, sot oryndaýshy men mediator, frilanser siiaqty jeke praktikamen ainalysyp júrgender. Olar tótenshe jaǵdaiǵa deiin tiisti áleýmettik jarna aýdarǵan bolsa, ótinish berýine bolady. Olardyń qataryna tótenshe jaǵdaiǵa deiin biryńǵai jinaqtyq tólemdi aýdarǵan adamdar da jatady. Beiresmi jumys istep júrgender – eshqashan eńbek shartyn jasamaǵan, salyq tólemegen, áleýmettik tólem tólemegen, tipti biryńǵai jinaqtyq tólemdi de tólemegen adamdar. Memleket basshysy osyndai adamdarǵa da 42 500 teńge tólenýi kerek ekenin, biraq ol úshin aldymen bir ret mártebesin rásimdeý kerek ekenin aitty. Mártebeni bir ret rásimdeý degen – biryńǵai jinaqtyq tólemdi tóleý. Ony bir ret tóleseńizder, 42 500 teńgeni ai saiyn alasyzdar. Beiresmi jumys istep júrgender BJT-ny tólegennen keiin kelesi kúni atalǵan portal arqyly ótinish bere alady», - dedi Eńbek ministri.
