Foto: Ekologiia jáne tabiǵi resýrstar ministrliginiń baspasóz qyzmeti
11 jeltoqsanda Halyqaralyq tabiǵat qorǵaý odaǵy kiiktiń Halyqaralyq Qyzyl tizimdegi «Joiylý aldynda turǵan» sanatynan «Qaýip tónýge jaqyn» sanatyna aýysatynyn jariialady. Kiiktiń «Joiylý qaýpi joǵary» sanatynan «Joiylý qaýpi az» sanatyna aýysýy Qazaqstandaǵy kiik sanynyń kóbeiýimen tikelei bailanysty, dep habarlaidy "Ult aqparat" Ekologiia jáne tabiǵi resýrstar ministrligine silteme jasap.
Vedomstvo málimetinshe, janýarlar túrlerin qorǵaý jáne sanaq júrgizý jónindegi memlekettik sharalar kesheni respýblikadaǵy kiik popýliatsiiasyn saqtaý men qalpyna keltirýde aitarlyqtai jetistikterge qol jetkizýge múmkindik bergen.
2003 jyly elimizdegi kiik sany – 21 myń bolsa, 2023 jyly Qazaqstandaǵy kiik sany 1 mln 915 myń daraqqa jetken (2023 jylǵy kóktemgi sanaq derekteri boiynsha Qazaqstandaǵy kiiktiń boljamdy sany – 1 915 000 daraqqa jetip, QazKSR kezeńiniń eń joǵary kórsetkishinen (1 200 000 daraq) asyp túsken.
"2006 jyldan bastap Qazaqstan Úkimeti jalpy aýdany 5 081 485 ga kiik mekendeitin jerlerde erekshe qorǵalatyn tabiǵi aýmaqtardy qurdy jáne keńeitti. Kiiktiń betpaqdala popýliatsiiasyn qorǵaý úshin «Yrǵyz-Torǵai», «Altyn Dala» memlekettik tabiǵi rezervattary, Oral popýliatsiiasy úshin «Bókeiorda» rezervaty quryldy.
Ministrliktiń qarapaiym inspektorlarynyń adal eńbeginiń, memlekettiń ekologiialyq saiasaty men azamattardyń jaýapkershiliginiń arqasynda kiik sanyn qalpyna keltirýde joǵary nátijelerge qol jetkizdik. Dúnie júzindegi kiik popýliatsiiasynyń 98 paiyzdan astamy Qazaqstanda shoǵyrlanǵan" - delingen habarlamada.
Vedomstvo málimetinshe, 2006 jyldan bastap Qazaqstan, Resei, Ózbekstan jáne Túrikmenstan arasynda kiiktiń saqtalýyna, qalpyna keltirilýine jáne ornyqty paidalanylýyna qatysty ózara túsinistik týraly memorandým sheńberinde ýaǵdalastyqtar qoldanylyp keledi. Bul qujat qonys aýdaratyn jabaiy janýarlar túrleri boiynsha Konventsiianyń (CMS) qatysýshylary retinde elderdiń halyqaralyq mindettemelerin oryndaý úshin qabyldanǵan.
"Sanaq pen qorǵaý isiniń júieliligi, sondai-aq ǵylymi jáne qoǵamdyq uiymdarmen yntymaqtastyq qarym-qatynastyń bolýy kiik sanyn turaqtandyrýǵa jáne olardy turaqty paidalanýdyń obektivti negizin jasaýǵa múmkindik berdi" - deidi vedomstvo ókilderi.
