Ýkraina syrtqy ister ministrligi Resei prezidenti Vladimir Pýtinniń anneksiialanǵan Qyrymǵa saparyna narazylyq bildirip, málimdeme jasady.
Kiev Pýtinniń saparyn Ýkraina egemendigi men aýmaq tutastyǵyn "óreskel buzý" dep atady. Ministrlik málimdeýinshe, "Resei biligi men bilikshil basylymdardyń muny memleket ishindegi "kezekti sapar" etip kórsetýi túkke turǵysyz". Vedomstvonyń 11 tamyzda jariialaǵan málimdemesinde Qyrym Ýkrainanyń "bólinbeitin bólshegi" dep sipattalady.
10 tamyzda Reseidiń memlekettik basylymdary Pýtinniń Qyrymdaǵy Sevastopol qalasynda ótken baikerler jiynyna qatysqanyn kórsetken. Sharany kremlshil "Nochnye volki" klýby uiymdastyryp edi.
Pýtin Sevastopolge Máskeýde ondaǵan myń adam mýnitsipaldyq sailaýdyń ádil ótýin talap etip, narazylyq bildirgen tusta saparlap bardy. Eriktiler dereginshe, 300-den asa adam ustalǵan.
2014 jyly kóktemde Resei Ýkraina quramyndaǵy Qyrym túbegin anneksiialap alǵan edi. Naýryzda Resei Qyrymda "referendým" ótkizip, túbekti óz aýmaǵyna qosqan. Halyqaralyq quqyq normalaryna sai kelmegen bul sheshimdi Ýkraina da, álemdik qaýymdastyqtyń basym bóligi de quptamai, aiyptaǵan.
