Elimizde qorshaǵan ortany qorǵaý men ekologiialyq máselelerge arnalǵan «Kieli tabiǵat» atty jańa You Tube arnasy iske qosyldy, dep habarlaidy QazAqparat.
«Búgin «Kieli tabiǵat» respýblikalyq ekologiialyq jobasy aiasynda jańa You Tube arnasyn iske qostyq. Atalǵan internet keńistiginde qaldyqtardy suraptaý men basqa da eko ádetterge baýlityn beinerolikter, beinesabaqtar jariialanatyn bolady. Ondaǵy maqsat – óskeleń urpaqtyń ekologiialyq saýattylyǵyn arttyrý. Sondai-aq, «Kieli tabiǵat» You Tube arnasynda qoǵamdaǵy ótkir ekologiialyq taqyryptarǵa arnalǵan áleýmettik beinerolikter de oryn alady. Memleket basshysy Qasym-Jomart Toqaevtyń ózi halyqtyń ekologiialyq saýattylyǵyn arttyrý kerektigin birneshe ret basa aitqan bolatyn. Osy oraida jumysty jasóspirimderden bastaǵan jón», - dedi «Jas Ulan» biryńǵai balalar men jasóspirimder uiymynyń tóraǵasy Dinara Sádýaqasova.
Onyń aitýynsha, qoǵamnyń ekologiialyq saýattylyǵyn arttyrý qozǵalysyna kópshilik qaýymǵa tanymal eko-ambassadorlar, belsendiler sonymen qatar qoǵamdyq uiymdar jumyldyrylady.
Odan bólek, uiym basshysy atalǵan jobany júzege asyrýda jasulandyqtardyń belsendi ról atqaratynyn erekshe atap ótti.
«Jasulandyqtardyń qatysýymen osyǵan deiin de birneshe qorshaǵan ortany qorǵaý, saqtaý taqyrybyna arnalǵan aktsiialar men senbilikter uiymdastyryldy. Sońǵy 1 aidyń ishinde 800 myńnan astam jasóspirim ekologiialyq aktsiiaǵa qatysty. Aldaǵy ýaqytta «Balapan» telearnasymen birlesip qorshaǵan ortaný aialaý taqyrybyna arnalǵan mýltfilm men telebaǵdarlama túsirý josparymyzda bar», - deidi ol.
Aita ketsek, búgin tusaýy kesilgen «Kieli tabiǵat» jobasy QR Aqparat jáne qoǵamdyq ministrligi men Azamattyq bastamalardy qoldaý ortalyǵynyń demeýshiligimen júzege asyrylyp jatyr.
