QR Premer-Ministri Asqar Maminniń tóraǵalyǵymen ótken Investitsiialyq ahýaldy jaqsartý jónindegi keńestiń (IAJK) otyrysynda kiberqaýipsizdikti qamtamasyz etý jáne kiberqylmyspen kúres máseleleri qaraldy, dep habarlaidy "Ult aqparat".
Qazaqstannyń kiberkeńistigin damytý perspektivalary jáne jaǵdaiy týraly baiandamamen, sondai-aq, atalǵan saladaǵy saiasatty jetildirý jónindegi usynystarymen QR tsifrlyq damý, innovatsiialar jáne aeroǵarysh ónerkásibi ministri A. Jumaǵaliev, ishki ister ministriniń orynbasary A. Kalaichidi, Qazaqstanda tirkelgen AQSh elshisi Ý. Mozer, Kanada elshisi N. Brýsso, Niderlandy elshisi A. Karstens, Ulybritaniia elshisi M. Gifford, Eýropalyq odaq isi boiynsha senimdi ókil Ramýnas Ianýshaýskas, sondai-aq, Ericsson, Microsoft, Honeywell, Citibank, Mastercard kompaniialarynyń ókilderi sóz sóiledi.
«2017 jyly “Tsifrlyq Qazaqstan” memlekettik baǵdarlamasy iske qosylǵan sátten bastap, kapital men aldyńǵy qatarly tehnologiialar aǵynynyń arqasynda energetika, kólik, aýyl sharýashylyǵy jáne qyzmet kórsetý salalarynda eleýli jetistikterge qol jetkizildi, bul ulttyq ekonomika ósiminiń mańyzdy faktoryna ainaldy», — dedi A. Mamin.
Osy jyldyń 9 aiynda Qazaqstannyń JIÓ 4,3%-ǵa ósti. Sonymen birge, ósimniń negizgi úlesi qosylǵan quny joǵary salalar men qyzmetterge tiesili. Halyqaralyq valiýta qory men Aziia damý banki 2019-2020 jyldarǵa arnalǵan QR ekonomikalyq ósiminiń boljamyn kóterdi. Dúniejúzilik ekonomikalyq forýmnyń Jahandyq básekege qabilettilik indeksindegi Qazaqstannyń pozitsiiasy 59-orynnan 55-orynǵa jaqsardy.
«Oń serpindi odan ári qamtamasyz etý úshin ekonomikamyzdy halyqaralyq jáne jergilikti kiberqylmystyń artyp kele jatqan syn-tegeýrinderinen qorǵaý úshin barynsha kúsh salý kerek. Dúniejúzilik ekonomikalyq forýmnyń boljamdaryna sáikes, 2022 jylǵa qarai kiberqylmys saldarynan álemdik ekonomikaǵa keltirilgen zalal $8 trln-nan asýy múmkin», — dedi Premer-Ministr.
Úkimet basshysy otyrys qatysýshylaryna kiber qylmysqa qarsy turý úshin Tuńǵysh Prezident Nursultan Nazarbaevtyń tapsyrmasy boiynsha «Qazaqstannyń kiberqalqany» kiberqaýipsizdik tujyrymdamasy ázirlengenin aitty. Ony iske asyrý aiasynda normativtik-quqyqtyq baza jetildirildi, Aqparattyq qaýipsizdiktiń ulttyq úilestirý ortalyǵy jáne Kiberqaýipsizdik máseleleri jónindegi keńes quryldy, halyqtyń tsifrlyq saýattylyq deńgeii 73%-ǵa deiin artty.
«Osy atalǵan sharalardyń nátijesinde Halyqaralyq elektrbailanysy odaǵy Qazaqstannyń Jahandyq kiberqaýipsizdik indeksindegi ornyn 2018 jyly 40-orynǵa deiin kóterdi, al oǵan deiin bir jyl buryn biz 83-orynda boldyq», — dedi A. Mamin.
Premer-Ministr Investitsiialyq ahýaldy jaqsartý jónindegi keńestiń quramyna kiretin shet memleketterdiń ókilderin kiberqaýipsizdikti qamtamasyz etý salasynda tyǵyz yntymaqtastyq ornatýǵa shaqyrdy.
