Búgin Chehiiada shaibaly hokkeiden 20 jasqa deiingi jastar quramalary arasynda álem chempionatynyń ekinshi kúninde Qazaqstan jastary Slovakiiamen kezdesti, dep habarlaidy "Ult aqparat".
Esterińizge sala ketelik, qazaqstandyq hokkeishiler A tobynda synǵa túsedi. Qarsylastary - Finliandiia, Shveitsariia, Shvetsiia jáne Slovakiia quramalary.
Budan buryn qazaqstandyq qurama Shveitsariiadan 3:5 esebimen jeńilip qalǵan edi. Degenmen atalmysh kezdesý asa tartysty ótti. Qazaqstandyq jastar oiyn barysynda eki márte tarazy basyn teńestirgenimen, nátijesinde qarsylasyna jol berip qoidy.
Búgin de oiyn tartysty órbidi. Eki kezeń boiy tabloda teń nátije janyp turdy. Aldymen slovak hokkeishisi Oliver Okýlar 24-minýtta esep ashqan edi. Al 49-minýtta qazaqstandyq hokkeishi Maksim Mýsorov tarazy basyn teńestirdi. Maksim Mýsorov osylaisha álem chempionatyndaǵy óziniń úshinshi golynyń avtory atandy. Degenmen 58-minýtta slovak hokkeishisi Daniel Tkach shaiba soǵyp ketti. Al 59-minýtta slovakiialyq Robert Dzogan qorytyndy esepti belgiledi. Osylaisha Qazaqstan jastary qarsylasynan 1:3 esebimen jeńilip qaldy.
Byltyrǵy álem chempionatynda Qazaqstan jastary Slovakiiadan 2:11 esebimen jeńilip qalǵan edi. Endi qazaqstandyq jastar 29 jeltoqsanda Finliandiiamen kezdesse, 30 jeltoqsanda Shvetsiia quramasymen baq synasady.
