Qurlyqtyq hokkei ligasy aiasynda elordalyq «Barys» búgin Reseide «Torpedo» (Nijnii Novgorod) komandasymen kezdesti, dep habarlaidy "Ult aqparat".
Eki komanda týrnir kestesinde qatar kele jatyr. Olardyń plei-off kezeńine shyǵýǵa múmkindigi zor. Sondyqtan kezdesýdiń tartysty bolatyny aldyn ala belgili edi.
Birinshi kezeńde qos komandanyń shabýylǵa kóbirek kóńil bólgeni baiqaldy. Dese de, esep birinshi kezeńniń sońyna taman ashyldy.
Oiynnyń 15-minýtynda «Barys» hokkeishisi Mett Frettin mergendik tanytty. Al 18-minýtta elordalyq Darren Dits esepti ústemelei tústi.
Aidyn ieleri tarapynan 19-minýtta Anton Shenfeld esep aiyrmasyn qysqartty.
Ekinshi kezeńde qos komanda esepti ózgertýge umtylǵan bolatyn. Áitse de, jankúierler soǵylǵan shaiba kórgen joq.
Úshinshi kezeń de tartysty órbidi. Qos komanda tarapynan gol soǵatyn birneshe múmkindik boldy. Sońǵy minýtta reseilik klýb qaqpashyny altynshy oiynshyǵa almastyrdy. Nátijesinde 59-minýtta Mihail Varnakov tarazy basyn teńestirdi. Oiyn overtaimǵa ulasty. Overtaimda elordalyq Iakob Lilia jeńis shaibasyn soqty. Kezdesýde «Barys» qarsylasyn 3:2 esebimen jeńdi.
Endi «Barys» 23 jeltoqsanda syrt aidynda Reseidiń «Avangard» komandasymen kezdesedi.
