Qurlyqtyq hokkei ligasynyń plei-off satysynda elordalyq «Barys» búgin, 4 naýryzda Reseide «Metallýrg» (Magnitogorsk) komandasymen ekinshi oiynyn ótkizdi, dep habarlaidy QazAqparat tilshisi.
Esterińizge sala ketelik, plei-off satysynyń alǵashqy oiynynda reseilik klýb 7:3 esebimen basym tústi.
Búgingi kezdesýde qos komanda shabýylmen birge qorǵanysqa da kóńil bóldi. Nátijesinde alǵashqy eki kezeńde komandalar bir-biriniń qaqpasyna nebári eki shaiba soqty.
Oiynnyń 11-minýtynda «Barys» hokkeishisi Kirill Paniýkov óz komandasyn alǵa shyǵardy. Al 28-minýtta «Metallýrg» sapynan Andrei Nestrashil tarazy basyn teńestirdi.
Negizgi kezeń 1:1 esebimen teń aiaqtalyp, oiyn overtaimǵa ulasty. Overtaimda jeńis shaibasyn Darren Dits soǵyp, qazaqstandyq klýbqa jeńis syilady. «Barys» qarsylasyn 2:1 esebimen jeńiske jetti. Oiyndar seriiasynda esep 1:1 esebimen teńesti.
Endi 6 jáne 8 naýryz kúnderi oiyndar elordada bolady. Qajet bolǵan jaǵdaida qosymsha oiyndar 10, 12, 14 naýryz kúnderi ótkiziledi.
Eki komanda buǵan deiin plei-off satysynda eki márte jolyqty. Onyń ekeýinde «Metallýrgtiń» joly bolsa, bireýinde «Barys» atalǵan qarsylasyn qapy qaldyryp ketti.
Aita keterligi, «Barys» qurlyq hokkei ligasyna biyl 13 márte qatysty. Sonyń on birinde plei-off satysynda baq synady. 2014, 2017, 2019, 2020 jyldarda jarystyń ekinshi kezeńine shyqty.
