Qurlyqtyq hokkei ligasy aiasynda elordalyq «Barys» búgin, 23 jeltoqsanda Reseide «Avangard» (Omby) komandasymen kezdesti, dep habarlaidy "Ult aqparat".
Elordalyq klýb sońǵy oiyndarda joǵary nátijemen kózge túsip keledi. Biyl olar sońǵy segiz kezdesýdiń altaýynda jeńiske jetti. Búginde jankúier kóńilinen shyǵatyn oiyn kórsetti.
«Barys» alǵashqy shabýylynyń birinde qarsylastar qaqpasynan sańylaý tapty. Oiynnyń 1-minýtynda elordalyq Roman Starchenko mergendigimen kózge tústi. Al 7-minýtta reseilik Kirill Semionov tarazy basyn teńestirdi.
Ekinshi kezeńniń 39-minýtynda «Barys» qaitadan alǵa shyqty. Bul joly Iakob Lilia múlt ketken joq.
Úshinshi kezeńniń 57-minýtynda elordalyq Fil Varone esepti ústemelei tústi. Osylaisha «Barys» qarsylasynan 3:1 esebimen basym tústi. Aita keterligi, qazaqstandyq klýb sońǵy toǵyz kezdesýdiń segizinde jeńiske jetip otyr.
Endi «Barys» elordada qatarynan úsh oiyn ótkizedi. Aldymen 26 jeltoqsanda Reseidiń «Amýr» (Habarovsk), 28 jeltoqsanda «Sibir» (Novosibir), 30 jeltoqsanda «Metallýrg» (Magnitogorsk) komandalarymen kezdesedi.
