Halyqaralyq olimpiada komitetiniń basshysy Tomas Bah beisenbi kúni Tokiodaǵy Olimpiada oiyndaryna keldi, dep habarlaidy Kyodo agenttigi.
HOK prezidenti Haneda áýejaiyna japon úkimeti 22 tamyzǵa deiin beiresmi taǵy bir tótenshe jaǵdai engizgen kúnnen keiin keldi. El úkimeti Olimpiada oiyndary infektsiianyń odan ári órshýine sebepshi bolýy múmkin dep alańdaidy.
Atalmysh sheshimdi sol kúnniń sońynda úkimet resmi túrde qabyldaýy kerek edi. Japondyq uiymdastyrýshylar Tokio jáne onyń mańaiyndaǵy alańdarda oiyndardy kórermendersiz ótkizýge kirisip te ketken.
Bah beisenbi kúni keshke kórermenderge bailanysty jańa saiasat týraly sheshim qabyldaý úshin japondyq uiymdar ókilderimen, olardyń ishinde uiymdastyrýshy komitetti basqaratyn Seiko Hashimotomen jáne Tokio gýbernatory Iýriko Koikemen kezdesý ótkizedi dep kútilýde.
Sársenbi kúni Tokioda koronavirýs juqtyrýdyń jańa 920 jaǵdaiy tirkeldi, bul mamyrdyń ortasynan bastap eń kóp táýliktik kórsetkish bolyp otyr. Sonymen qatar meditsinalyq sarapshylar álemniń kóptegen elderi infektsiianyń juqpalylyǵy joǵary delta shtamymen kúresip jatqanda, oiyndardy jalǵastyrý qaýipti ekenin eskertedi.
Japoniianyń uiymdastyrýshy komitetiniń habarlaýynsha, Bah karantindi qonaq úide úsh kún ótkizedi. Ol Harými jaǵasyndaǵy tokiolyq aýdandaǵy sportshylar aýylyna baryp, uiymdastyrýshylarmen qashyqtan jáne kózbe-kóz kezdesý ótkizýdi josparlap otyr.
