- Úkimettiń búgingi otyrysynan keiin jýrnalisterge suxbat bergen Premer-ministrdiń orynbasary - aýyl sharýashylyǵy ministri Asqar Myrzaxmetov paramen ustalǵan veterinarlyq baqylaý basshysynyń áreketine qatysty óz oiyn jetkizdi. Onyń aitýynsha, Saqtash Hasenov óz qyzmetinen áli bosatylǵan joq, dep xabarlaidy QazAqparat tilshisi Úkimet úiinen.
«Ol zańdy buzdy. Bul - onyń jeke jaýapkershiligi. Demek, zań boiynsha jaýap berýi tiis. Qazir tergeý júrip jatyr. Onyń kinási dáleldenetin bolsa, ministrlik ony ne úshin qorǵaýy tiis? Árine, bundai faktiniń oryn alýy - ókinishti jaǵdai. Sebebi ministrlik veterinarlyq qyzmetti kúsheitemiz dep jatqanda dál osy salada ondai árekettiń bolǵany orynsyz», - dedi A.Myrzaxmetov.
Ministrdiń aitýynsha, Hasenovtyń qatysýymen elimizge jetkizilgen qus etinen qaýiptenýdiń qajeti joq. Sebebi atalǵan taýardyń barlyǵy tiisti tekserý sharalarynan ótken.
«Kez kelgen aýyl sharýashylyǵy ónimderi tiisti tártippen tekseriledi. Sondyqtan ol ettiń ishinde qaýipti ónim bar dep aitýǵa bolmaidy. Hasenovtyń ózi qyzmetinen áli bosatylǵan joq. Sebebi osyndai jaǵdaida sot sheshimi shyqpai, ony jumystan bosatýǵa bolmaidy. Sońǵy sózdi sot aitady. Árine, búginde aýyl sharýashylyǵy salasynda atqarylyp jatqan jumystar kezinde osyndai jaǵdaidyń oryn alǵany ókinishti», - dep atap kórsetti ministr.
Eske sala ketsek, 4 qarashada Sybailas jemqorlyqqa qarsy is-qimyl ulttyq biýrosy para aldy degen aiyppen QR AShM Veterinariialyq baqylaý jáne qadaǵalaý komitetiniń tóraǵasy Saqtash Hasenovti ustaǵan bolatyn. Onyń zańsyz qamqorlyǵymen osy jylǵy naýryz ben qazan aralyǵynda el aýmaǵyna 7,4 myń tonnadan astam qus eti ákelingen jáne sol qyzmeti úshin iri kólemde para alǵan dep aiyptalyp otyr.
