Vetnamnyń Hanoi qalasynda vetnam tiline aýdarylǵan Abaidyń «Qara sózderi» kitaby tanystyryldy. Bul týraly QR Syrtqy ister ministrligi habarlaidy.
Qazaqstan Elshisi Erlan Baijanovtyń aitýynsha, Abai shyǵarmashylyǵy qazaq halqy tarih toǵysynda turǵan kezeń – XIX ǵasyrdyń aiaǵyna sáikes keledi.
«Ózgergen álem dástúrli kóshpeli qoǵamdy orny tolmastai joiyp jatqanyn, al qazaq halqy tarih qaltarysynda qalyp qoimaý úshin qalyptasqan tártiptiń tolyq jańarýynan ótýi kerek ekenin aqyn óte jaqsy bildi. Mine, bul kitapta onyń otandastaryna degen úndeýi osyǵan negizdeldi», - dedi Hanoi ulttyq pedagogikalyq ýniversitetinde oishyldyń áigili týyndysyn tanystyrǵan E.Baijanov.
Kitaptyń vetnamdyq basylymynda alǵysóz retinde Qazaqstan Prezidenti Qasym-Jomart Toqaevtyń «Abai jáne Qazaqstan HHI ǵasyrda» atty maqalasy jazylǵan. Sonyń arqasynda vetnamdyq oqyrman Abai tulǵasy men onyń murasynyń qazirgi qoǵam úshin mańyzy týraly qundy oilar jinaqtai alady.
Diplomattyń aitýynsha, aýdarma kitaptyń tusaýkeseri Hanoi ulttyq pedagogikalyq ýniversitetinde ótip jatqanynyń simvoldyq máni bar – munda Abai atyndaǵy ǵylym jáne mádeniet ortalyǵy jumys isteidi.
«Qara sózderdi» vetnam tilinde basyp shyǵarý – Vetnam aýditoriiasy úshin Qazaqstan, onyń halqy, qazaq tarihy, mádenieti men ádebieti týraly kóbirek bilýge taptyrmas múmkindik», – dedi ýniversitettiń Ákimshilik keńesiniń tóraǵasy jáne partiialyq komitetiniń hatshysy Do Vet Hýng.
Abai kitabynyń aýdarmashylarynyń biri, Vetnam jazýshylar odaǵynyń vetnamdyq jáne orys ádebietterin taratýǵa qolǵabys kórsetý qory direktorynyń orynbasary Le Dyk Man da óz pikirimen bólisti. Kórkem aýdarma sheberi atqarylǵan jumys týraly oi qozǵai otyryp: «Aýdarma qyzmeti – bul eki ulttyń, eki mádeniettiń bailanystyrýshy kópiri, al árbir aýdarma osy kópirdiń ajyramas bóligi bolyp tabylady. Bizdiń aýdarma Vetnam men Qazaqstan arasyndaǵy osy kópirdiń alǵashqy bóligini biri bolǵanyna qýanyshtymyn», - dedi.
Ho Shan Min Ulttyq saiasi akademiiasynyń Halyqaralyq qatynastar departamentiniń direktory Hoang Van Ngiia eki eldi joǵary deńgeidegi saiasi qatynastar men saýda-ekonomikalyq bailanystar biriktiretindigin, alaida mádeniet jáne bilim salasyndaǵy yntymaqtastyqtyń aýqymy olarǵa sáikes kelmeitindigin basa aitty. Ol bul kitap osy olqylyqty ishinara toltyrady jáne odan ári vetnamdyqtar Abai shyǵarmashylyǵyna, onyń ózin-ózi damytý, mádeniet, bilim berý jáne qoǵamdyq adamgershilik salasyndaǵy ideialary men filosofiiasyna qyzyǵýshylyq tanyta bastaidy degen senim bildirdi.
Ýniversitettiń Tarih fakýltetiniń dekany Dao Týan Thannyń aitýynsha, Abai Qunanbaiulynyń ómiri men shyǵarmashylyǵy qazaq halqynyń ulttyq biregeilikti saqtaý, eldi jańǵyrtý jáne reformalaý jolyndaǵy tynymsyz kúresin ainadai kórsetedi.
«Onyń oilaryn zerttei otyryp, men onyń kóptegen progressivti ideialarynyń qazirgi zamanǵa sáikes keletindigin, dáýirinen asyp kekten kózqarastardy kórsetetindigin anyqtadym. Menińshe, Abaidy «Shyǵystyń Volteri» dep ataýǵa bolady. Bul tulǵaaldymyzda alty keiipte kórinis tabady: filosof, aqyn, qazaq ádebietiniń negizin qalaýshy, kompozitor, aýdarmashy jáne aǵartýshy», - deidi ol.
«XIX ǵasyrdyń aiaǵy - HH ǵasyrdyń basyna jatatyn «Qara sózder» óziniń ózektiligimen tańǵaldyrady. Onda ulttyq jáne álemdik mádenietterdi integratsiialaý, jastardy tárbieleý, rýhani tárbie, adamgershilik jáne gýmanizm máseleleri siiaqty máseleler kóteriledi», – dep ýniversitettiń Filologiia fakýltetiniń dekany Do Hai Fong ta nazar aýdartty.
Is-shara barysynda qatysýshylar Abaidyń mýzykalyq murasymen tanysty, olarǵa «Kózimniń qarasy», «Aittym sálem, Qalamqas», «Jelsiz túnde jaryq ai», «Qarańǵy túnde taý qalǵyp», «Segiz aiaq» atty eń áigili ánderi oryndalǵan beinerolikter kórsetildi.
Qazaq klassiginiń 175 jyldyǵyn merekeleý aiasynda Vetnamdaǵy Qazaqstan Elshiligi uiymdastyrǵan tusaýkeserge ýniversitettiń professorlyq-oqytýshylyq quramy men stýdentteri, sheteldik elshilikterdiń diplomattary, burynǵy KSRO elderimen dostyq toptarynyń jergilikti qaýymdastyqtarynyń jetekshileri, Vetnamnyń jetekshi aqparattyq agenttikteri men telearnalarynyń jýrnalisteri qatysty.
