Baqytgúl Hamenova bir apta buryn Atyraý oblysy ákiminiń orynbasary laýazymynan bosatylǵan.
Oblys ákiminiń baspasóz qyzmeti bul derekti rastady, - dep habarlaidy QazAqparat.
Baspasóz qyzmetiniń málimetinshe, Atyraý oblysynyń ákimi Baqytgúl Hamenovany atqaratyn laýazymynan bostaý týraly ókimge 2022 jylǵy 3 tamyzda qol qoiylǵan.
«Hamenova Baqytgúl Qaiyrjanqyzy Qazaqstan Respýblikasynyń 2015 jylǵy 23 qarashadaǵy «Qazaqstan Respýblikasynyń memlekettik qyzmeti týraly» Zańynyń 59-babynyń 9-tarmaqshasyna sáikes memlekettik saiasi qyzmetshini ol atqaratyn laýazymǵa taǵaiyndaý (sailaý) quqyǵy berilgen laýazymdy adamnyń (organ) tiisti sheshimi boiynsha QR Prezidenti Ákimshiliginiń kelisimimen oblys ákiminiń 2022 jylǵy 3 tamyzdaǵy №267-ó ókimimen atqaratyn laýazymynan bosatyldy», - dep habarlady ákimniń baspasóz qyzmetinen.
Aita keteiik, Hamenova Atyraý oblysy ákiminiń orynbasary laýazymyna 2020 jylǵy 13 naýryzda taǵaiyndalǵan.
Baqytgúl Hamenova Abai eskertkishin ornatýǵa bólingen qarajattan para aldy degen kúdikpen ustaldy. Ol byltyrǵy jeltoqsan aiynda ustalyp, tergeý izoliatoryna qamaýǵa alyndy.
Búgin, 11 tamyzda Atyraýdaǵy №2 qalalyq sotta Hamenovaǵa qatysty otyrys ótip jatyr.
Baqytgúl Hamenova men Aqylbek Rysqalievtiń isi QR Qylmystyq kodeksiniń 366-baby 3-bóliginiń 3-tarmaǵymen tergelgen. Al, «Balqytý» JShS direktory Ómirtai Adamov QR Qylmystyq kodeksiniń 367-baby 2-bóligimen tergeýge alynǵan.
Sotta Hamenova ózine taǵylǵan aiypty moiyndaǵan joq.
Al, onyń advokaty Baqytgúl Hamenovany úi qamaǵyna aýystyrýdy surady.
Sot advokattyń ótinishine qatysty ázirge naqty sheshim shyǵarǵan joq.
