Izrail men Palestina arasyndaǵy qaqtyǵys kúrt ýshyqqan shaqta Germaniia syrtqy ister ministri Haiko Maas 20 mamyrda Izrailge ushyp bardy. Ol Izrail basshylyǵymen kelissóz júrgizip, Palestina premer-ministri Muhammed Shtaiege de jolyqpaqshy, dep habarlaidy Azattyq.
Germaniia ministriniń sapary – halyqaralyq qaýymdastyqtyń qaqtyǵysty toqtatýǵa kúsh salyp jatqandyǵynyń bir kórinisi. Maas birneshe aptadan beri Gaza sektoryndaǵy palestinalyq radikaldy toptar tarabynan shabýylǵa ushyraǵan Izrailmen birge ekenin jetkizip, alaida atysty tezirek toqtatýǵa shaqyrǵan.
Ótken aptanyń dúisenbisinen beri Izrail men palestinalyq toptar bir-birine kezek-kezek aiaýsyz soqqy jasap jatyr. Izrail jaǵyna qarai 4 myńnan astam zymyran ushyrylǵan. Keibiri ǵana nysanaǵa jetken. Birqatar qalalar búlingen, sońǵy málimet boiynsha Izraildiń 12 turǵyny qaza bolǵan. Óz kezeginde Izrail áskeri de Gazadaǵy HAMAS radikaldy tobynyń nysandaryna soqqy jasap jatyr. Alaida qaza bolǵandar arasynda beibit turǵyndar az emes. Gazada barlyǵy 220-dan astam adam opat bolǵan. Beisenbige qaraǵan túni de shabýyl tolastamaǵan, alaida aqparatqa qaraǵanda aldyńǵy kúnderdegidei emes – soqqy pármeni báseńdegen.
HAMAS tobynyń joǵary laýazymdy ókili beisenbi kúni Izrailmen bitim 1-2 kúnde jasalýy múmkin dep málimdedi. Janama kelissózder jaily málimet az – ádette mundai jaǵdaida Egipet arqyly kelissóz júrgiziledi.
Izraildiń ózin-ózi qorǵaý quqyǵyn moiyndaǵan AQSh taraptardy atysty toqtatýǵa shaqyrǵan.
Sarapshylardyń aitýynsha, bul - 2014 jyldan bergi osy aimaqta bolǵan iri qaqtyǵys. Oǵan Shyǵys Ierýsalimnen birneshe palestinalyqty kóshirý týraly sot sheshimi túrtki bolǵan.
