Almaty oblysynyń bas sanitarlyq dárigerine tártiptik is qozǵaldy. Bul týraly QR Memlekettik qyzmet isteri agenttiginiń resmi ókili Erhan Tátken aitty, dep habarlaidy "Ult aqparat".
QR Memlekettik qyzmet isteri agenttigi Almaty oblysynyń bas sanitar dárigeri Erǵali Sydymanovtyń Taldyqorǵan qalasy turǵyndarymen kezdesýi barysyndaǵy videoǵa nazar aýdaryp, onyń barysynda Memlekettik qyzmetshiniń ádep kodeksin buzý faktisin anyqtaǵan.
«QR Memlekettik qyzmet isteri agenttiginiń Almaty oblystyq departamentine isti Ádep jónindegi keńeste qarai otyryp, memlekettik qyzmetshige qatysty tártiptik is qozǵaý tapsyryldy. Tártiptik isti qaraý nátijesi qoǵamǵa jetkiziletin bolady», - dedi QR Memlekettik qyzmet isteri agenttiginiń resmi ókili Erhan Tátken.
Eske sala ketsek, budan buryn áleýmettik jelide sheneýniktiń Taldyqorǵan kásipkerlerimen kezdesýiniń videosy taralǵan bolatyn. Onda turǵyndar bas sanitarlyq dárigerdiń dórekilik tanytqandyǵyna shaǵymdanǵan edi. Osydan keiin QR Densaýlyq saqtaý ministri Aleksei Tsoi Almaty oblysy bas sanitarlyq dárigerine qatysty tekserýdi bastaýdy tapsyrdy.
Aita keterligi, Erǵali Sydymanov Almaty oblysynyń Taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy bolyp 12 tamyzda ǵana taǵaiyndaldy.
