Qazaqstannyń keibir aimaǵynda 4 mamyrdan bastap Halyqqa qyzmet kórsetý ortalyqtarynyń jumysy qaita jandanady, dep habarlaidy "Ult aqparat".
«Azamattarǵa arnalǵan úkimet» korporatsiiasy atap aitqanda, Nur-Sultan qalasy men Batys Qazaqstan, Qaraǵandy jáne Mańǵystaý oblystarynda HQO-lar qaita jumysyn bastaitynyn málimdedi. Atalǵan óńir ákimdikteriniń janyndaǵy tótenshe jaǵdai tártibin qamtamasyz etý jónindegi shtabtar osyndai sheshim qabyldaǵan. Alaida, virýstyń taralý qaýpine jol bermeý úshin Halyqqa qyzmet kórsetý ortalyqtarynyń jumys tártibin ózgertý týraly sheshim qabyldanyp otyr.
Ózgerister kórsetiletin memlekettik qyzmet túrlerine jáne olardy usyný formatyna qatysty. Máselen,
- endi HQO-larda elektrondyq formatta qoljetimsiz, tek «qaǵaz» júzindegi qyzmetter kórsetiledi.
- sondai-aq egov.kz portalynda aldyn ala rásimdelgen ótinishterdiń nátijesin berý júzege asyrylady.
- HQO-ǵa barý úshin «1414» bailanys ortalyǵy nemese nemese egov.kz saityndaǵy arnaiy servis arqyly kezek ýaqytyn aldyn ala brondaý qajet.
«Azamattarǵa arnalǵan úkimetten» málim etkendei, bul ózgerister azamattardyń HQO-da kóptep jinalýyn boldyrmai, virýsty juqtyrý qaýpin joiady. Osy rette qyzmet alýshylar da óz ýaqytyn únemdeidi. Aldyn ala brondaýsyz esh qyzmet kórsetilmeidi.
«Azamattar elektrondy formatqa aýdarylǵan jáne egov.kz portalynda qoljetimdi barlyq memlekettik qyzmettiń 80 paiyzdan astamyn tek ózdiginen nemese burynǵydai HQO ǵimarattarynda emes, ákimdikter janyndaǵy keńselerde, oqý oryndarynda, meditsinalyq uiymdarda jáne taǵy basqa jerde ornalastyrylatyn ózine-ózi qyzmet kórsetý sektorlarynda ala alady. Onlain qyzmetterdi jyldam ári yńǵaily alý úshin azamattar 1414 nómirine habarlasa alady. Onda HQO operatorlary keńes beredi», - dep habarlaidy korporatsiiadan.
Aita keterligi, karantin jariialanǵaly beri qazaqstandyqtar egov.kz elektrondyq úkimet portaly, telegramdaǵy eGovKzBot2.0 boty jáne eGovMobile mobildik qosymshasy arqyly óz betinshe onlain túrde 10,5 millionnan astam memlekettik qyzmetti alǵan.
Degenmen, 3 sanattaǵy azamattar, iaǵni zeinetkerler, kópbalaly otbasylar jáne múgedekter elektrondyq qyzmetterdi HQO-dan ala alady. Ár front-ofiste olar úshin jeńildik terezesi jumys isteidi. Sondai-aq olar da HQO-ǵa baratyn ýaqytyn aldyn ala brondaýy kerek.
Atalǵan ózgerister Nur-Sultan, Almaty, Shymkent qalalary men oblys ortalyqtaryndaǵy HQO-lar jumysyna qatysty. Al aýdan ortalyqtary men aýyldyq jerlerdegi HQO-lar jumysy esh ózgeriske ushyramaidy.
2020 jylǵy 4 mamyrda jumysyn qaita bastaityn HQO tizimin myna siltemeden kórýge bolady.
