Dúniejúzilik banktiń Qazaqstandaǵy turaqty ókili Jan-Fransýa Marto men IýNISEF ókili Artýr van Dizen Qazaqstanda qashyqtan oqytý úshin tańdalǵan tetikter týraly óz pikirlerin bildirdi, dep habarlaidy QazAqparat.
Qazirgi tańda elde 3,2 mln astam oqýshy qashyqtan oqytý formatyna kóshti. Negizinen telesabaqtar men arnaiy mamandandyrylǵan bilim beretin internet-platformalar qoldanylýda. Oqýshylarmen keri bailanys «Kúndelik», «Mektep.edu.kz jáne «Bilimal.kz elektrondy jýrnaldary, sondai-aq «Google Classroom», messendjerler, elektrondyq poshta jáne poshta qyzmeti arqyly jasalady. Barlyq telesabaqtar Internette qoljetimdi. Bul qajet bolǵan jaǵdaida videosabaqtardy qaita kórýge múmkindik beredi. Qosymsha retinde telesabaqtardyń radio nusqasy da usynylǵan.
Dúniejúzilik bank ókili atap ótkendei, búgingi kúni barlyq elder jańa jaǵdailarǵa beiimdelýge tyrysýda jáne bilim berýde Internetke qosylý deńgeiine bailanysty túrli tetikterdi qarastyrýda. Dúniejúzilik bank kóptegen elderge úzdiksiz bilim berý protsesin qamtamasyz etý maqsatynda qysqa merzimdi jáne uzaq merzimdi sharalar boiynsha usynystar berdi.
«Jalpy, Qazaqstannyń tańdaǵan tásilderi, telesabaqtar men radiosabaqtardy paidalanýdy qosa alǵanda, bizdiń usynystarymyzben sáikes keledi. Óitkeni, eń mańyzdysy – qiyn jaǵdailarda barlyq oqýshylardyń bilimge qol jetkizýin qamtamasyz etý. Sol sebepti, Sizder barlyǵyn durys istep jatyrsyzdar. Barlyǵy da basynan bastap 100 paiyz jumys istep ketedi dep kútýge bolmaidy, sebebi barlyǵynyń osy jaǵdaiǵa beiimdelýi qajet», – dep atap ótti DB-nyń Qazaqstandaǵy turaqty ókili Jan-Fransýa Marto.
IýNISEF-tiń Qazaqstandaǵy ókildigi ókil Artýr van Dizenniń atynan Qazaqstannyń Bilim jáne ǵylym ministrligine resmi hat joldap, onda COVID-19 pandemiiasyna bailanysty tótenshe jaǵdai kezeńindegi tabysty yntymaqtastyǵy úshin alǵys bildirdi.
«IýNISEF QR Bilim jáne ǵylym ministrliginiń karantin men qashyqtan jumys isteý rejimine qaramastan, oqý protsesin qamtamasyz etý boiynsha basqa memlekettik organdarmen áriptestikte tanytqan kúsh-jigerin quptaidy. Sondai-aq, ministrlik qalyptasqan ahýaldy nazarǵa ala otyryp, qabyldanatyn sheshimderin jaǵdaiǵa qarai beiimdeý úshin qajetti qadamdar jasaýda, ádistemelik jáne tehnikalyq máseleler, qolda bar oqytý platformalary men arnalardy jandandyrý boiynsha jumystardy jalǵastyrýda», - delingen resmi hatta.
Atalǵan halyqaralyq uiymdar tótenshe jaǵdai kezinde QR Bilim jáne ǵylym ministrligine qashyqtan oqytý máselelerinde qoldaý kórsetýdi jalǵastyrýǵa daiyn ekenin málimdedi.
