Aýǵanstan azamattyq aviatsiia basqarmasy kommertsiialyq reis jasaityn ushaqtardy Aýǵanstan aspanyn ainalyp ótýge shaqyrdy. Kabýlǵa qonatyn jáne ushyp shyǵatyn ushaqtardy ásker baqylaidy. Álemniń kóptegen elderi Kabýlden azamattaryn jyldam áketýge tyrysyp jatyr.
16 tamyzda azamattyq aviatsiia Kabýl áýe keńistigi arqyly ótetin tranzit "baqylaýsyz" qalatynyn málimdedi, dep jazady Azattyq radiosy.
Jeksenbide "Taliban" qozǵalysy Aýǵastan astanasy Kabýldy soǵyssyz alyp, qazir Kabýl áýejaiynan azamattaryn evakýatsiialaýǵa tyrysyp jatqan Batys elderin tańyrqatty.
Germaniianyń Lufthansa aviakompaniiasy Aýǵanstan azamattyq aviatsiia basqarmasynyń habarynan keiin baǵytyn ózgertti.
Ushaq baǵyttaryn baqylaityn FlightRadar24 saity Chikagodan Delige ushqan Air India laineri Aýǵanstan áýe jolynan dereý shyǵyp ketkenin Twitter arqyly habarlady. Bakýden Delige baratyn Terra Avia ushaǵy da Aýǵanstandy ainalyp ótken.
Jeksenbide tálipter (Qazaqstanda, taǵy birqatar elde terrorlyq uiym retinde tyiym salynǵan "Taliban" radikal islam qozǵalysynyń ókilderi) Aýǵanstan astanasy Kabýldy uryssyz alyp, prezident saraiyna kirdi. Aýǵanstan prezidenti Ashraf Ǵani eldi tastap ketti.
Kabýlǵa komendant saǵaty engizildi. Batys elderiniń shaǵyn áskeri kontingenti qorǵap turǵan áýejai jeksenbi kúni diplomattar ornalasatyn ýaqytsha bazaǵa ainaldy. Onda AQSh, Frantsiia men Germaniianyń diplomattary bar. Aýǵanstannan ketkisi keletin ózge de myńdaǵan adam áýejaiǵa jinalǵan. Kommertsiialyq reister jeksenbidegi atystan keiin toqtap qalǵan.
Dúisenbide júzdegen adam Aýǵanstannan ketý úshin áýejai qorshaýyn buzyp ótip, ushaq traptaryna qarai umtyldy. AQSh áskeri qyzmetkerleri nópirdi toqtatý úshin aspanǵa oq atyp, eskertýge májbúr bolǵan.
Pentagon AQSh azamattary men AQSh-pen yntymaqtasa jumys istegen aýǵan azamattaryn evakýatsiialaýǵa kómektesý úshin Kabýldegi áskeri kontingentin 6 myń adamǵa deiin ýaqytsha kóbeite turatynyn málimdedi.
