Búgin kórshiles Ózbekstan Respýblikasy №452 «Samarqan-Astana-Nurly jol» halyqaralyq júrdek poiyzyn Qazaqstanǵa saltanatty túrde shyǵaryp salyp, qatynas kóliginiń alǵashqy reisi Shymkentke kelip jetti, dep habarlaidy "Ult aqparat" oblys ákiminiń baspasóz qyzmetine silteme jasap.
Saryaǵash vokzaly arqyly Shymkentte aialdaǵan júrdek poiyzdy shahar jurtshylyǵy sán saltanatymen qarsy alyp, jolaýshylarǵa sátti sapar tiledi. Meimandardy kútip alǵan OQO jolaýshylar kóligi jáne avtomobil joldary basqarmasynyń basshysy Nurlan Baiǵut bul qatynas jolynyń Qazaqstan men Ózbekstannyń ózara mádeni, rýhani, ekonomikalyq bailanystary men týrizm salalaryn damytýǵa nyǵaitatynyn jetkizdi.
«Buǵan deiin «Almaty-Tashkent» baǵytyndaǵy temir jol baǵyty ashylsa, búgin «Samarqan-Astana-Nurly jol» halyqaralyq júrdek poiyzynyń alǵashqy reisin qarsy alyp otyrmyz. Bul sanaýly kúnderden soń bastalatyn EKSPO-2017 halyqaralyq kórmesi qarsańynda keremet jańalyq bolyp tur. Iaǵni, budai bylai, Ózbekstannyń eń kóne shaharlarynyń biri Samarqannan Astanaǵa arnaiy poiyz júretin bolady. Uzyndyǵy 2 myń shaqyrymǵa jýyqtaityn temir jol baǵyty aptasyna bir kún júretin bolady. Jol baǵyty juma kúni Shymkent arqyly Astanaǵa jol tartsa, jeksenbide Shymkentten Tashkent arqyly Samarqan baǵytyna júretin bolady», - dedi N.Baiǵut.
Qos elge ortaq temirjol baǵytyn shyǵarý týraly sheshim osy jyldyń naýryz-sáýir ailarynda eki el Prezidentteriniń Astanadaǵy, Saryaǵashtaǵy basqosýlary jáne Q.Mamin bastaǵan úkimettik jumys tobynyń Tashkentke barýynyń nátijesinde múmkin bolyp otyr. Osynaý kezdesýlerdiń nátijesi - Qazaqstan men Ózbekstan arasyndaǵy ónerkásip, saýda-logistika, kólik qatynastarynyń jáne ózge salalardaǵy bailanystardyń dami bastaǵanynyń aiǵaǵy retinde búgingi sharany aitýǵa bolady.
Qos memlekettiń týrizm salasyn odan ári damytýǵa atsalysatyn jol baǵyty baýyrlas elderdiń mádeni bailanystaryn da nyǵaitady dep kútilýde. Sonymen qatar, jańa júrdek poiyzy elimizde ótetin EKSPO-2017 halyqaralyq kórmesine qonaqtardy tasymaldaýǵa airyqsha atsalyspaq.
Shymkentte aialdaǵan 20 minýt ishinde jolaýshylar poiyzǵa qaita otyryp, Shymkent temir jol vokzalynan Astana qalasyna attandy.
Aita ketý kerek, Samarqan-Astana baǵytyna jol júrý quny 28 myń teńgege jýyqtaidy.
