QR Profilaktikalyq meditsina akademiiasynyń prezidenti Almaz Sharman koronavirýstyń «omikron» shtamynyń órshýi kezinde halyqaralyq reisterdi shekteý máselesine qatysty aitty, dep habarlaidy QazAqparat.
Professordyń aitýynsha, «omikronnyń» ózi koronavirýstyń óte juqpaly nusqasy bolyp tabylady.
«Halyqaralyq reisterdi shekteýmen indettiń taralýy azaimaidy. Adam qai elge, qalai barsa da, infektsiianyń taralýy joǵary qarqynmen taraidy. Sol sebepti bul turǵyda halyqaralyq reisterdi shekteý erekshe ról oinamaidy.
Degenmen, Rojdestvo merekesine orai demalystar qarsańynda Eýropada kúnine tórt myńǵa jýyq halyqaralyq reis ushýyn doǵardy. Sebebi ushqyshtar koronavirýstyń «omikron» shtamyn birinen soń biri juqtyra bastady. Sondyqtan «omikronǵa» bailanysty epidemiiaǵa qarsy barlyq sharalar saqtalýy kerek», - dedi Almaz Sharman agenttik tilshisine telefon arqyly.
Budan bólek, A.Sharman ekonomikalyq belsendiliktiń báseńdeýinde halyqaralyq bailanys, reister men saýdadaǵy shekteýler úlken ról atqarǵanyn atap ótti.
«Pandemiia álemniń kóptegen elinde ekonomikalyq belsendiliktiń kúrt tómendeýine ákeldi. Jalpy ishki ónim azaidy. Logistika men jumys oryndaryn qurýda kóptegen máseleler týyndady», - dedi ol.
Almaz Sharman «omikron» shtamynyń óte juqpaly ekenin aityp otyr.
«Jańa «omikron» shtamy «deltamen» salystyrǵanda myń ese juqpaly. Degenmen, ol infektsiia men alǵashqy belgilerdiń paida bolýy arasyndaǵy qysqa merzimmen sipattalady. Omikronnyń aýyr asqynýdy az mólsherde týdyratyny da aitylady. Ol negizinen joǵarǵy tynys joldarynda shoǵyrlanǵan. Ókpege sirek túsedi. Degenmen, qart adamdar men sozylmaly aýrýlary bar adamdarǵa, sondai-aq jas balalarǵa úlken qaýip týdyrady. Sondyqtan barlyq saqtyq sharalary qajet. Sebebi indettiń juqpalylyǵynan naýqastar aýrýhanaǵa áli kóp túsetin bolady. Qazir kóptegen meditsina qyzmetkerleri de aýrý juqtyrýda. Sol úshin betperde kiiý, áleýmettik qashyqtyqty saqtaý jáne vaktsinatsiia rejimi saqtalýda. Osy oraida býsterlik dozasy egde jastaǵy adamdar men sozylmaly aýrýy barlarǵa aýyr zaqymdanýlardyń deńgeiin aitarlyqtai tómendetedi degim keledi.
Men «omikrondy» qatań shekteýlerdi qajet etetin sońǵy indet jáne bolashaqta pandemiiamen kúrespeitin bolamyz dep úmittenemin», - dep túiindedi professor.
