QR Bilim jáne ǵylym ministrliginiń Mektepke deiingi jáne orta bilim komitetiniń tóraǵasy Gúlmira Kárimova halyqaralyq olimpiadalardyń jeńimpazdaryna qandai qosymsha múmkindikter jasalatynyn aitty, dep habarlaidy QazAqparat.
«Mekteptegi bilim berýdiń sapasy men tiimdiligin sipattaityn negizgi parametrlerdiń biri – daryndy balalardy anyqtaý, damytý jáne olardy respýblikalyq, halyqaralyq olimpiadalar men ǵylymi jarystarǵa qatystyrý. 2020-2021 oqý jylynda qazaqstandyq 26 oqýshy jeti bedeldi halyqaralyq pán olimpiadalarynyń jeńimpazdary men júldegerleri atandy. 2021 jylǵy 1 qyrkúiektegi Qazaqstan halqyna Joldaýynda Prezident osyndai daryndy balalardy, sondai-aq olardyń ustazdaryn jan-jaqty qoldaý mindetin qoidy. Halyqaralyq olimpiadalardyń jeńimpazdary men júldegerlerin, olardyń pedagogterin kótermeleý olardy halyqaralyq deńgeide joǵary nátijelerge qol jetkizýge yntalandyrý tetigi bolyp otyr. Bul jalpy alǵanda eldiń bilim salasy men adami kapitalynyń damýyna oń áser etedi. Sonymen qatar, mundai yntalandyrý mehanizmi tiisti normativtik quqyqtyq aktilermen rettelýi jáne júielenýi kerek, iaǵni yntalandyrý qarastyrylatyn naqty olimpiadalardyń tizimi bekitilýi tiis», - dedi G. Kárimova Ortalyq kommýnikatsiialar qyzmetinde.
Osy oraida Joldaýdy iske asyrý jónindegi Jalpy ulttyq is-sharalar josparyn oryndaý maqsatynda jeńimpazdar men júldegerlerdi joǵary jáne joǵary oqý ornynan keiingi bilim berý uiymdaryna konkýrstan tys qabyldaý, júldegerlerge jáne olardy daiyndaǵan pedagogterge birjolǵy aqshalai syilyq berý josparlanyp otyr. Sondai-aq, joǵary oqý oryndaryna konkýrstan tys qabyldaý úshin olimpiadanyń páni kadrlardy daiyndaý baǵytyna sáikes kelgen jaǵdaida, bilim grantaryn taǵaiyndaý júzege asyrylady. Jyl saiyn shamamen 50 jeńimpazǵa granttar bólinedi. Mysaly, 2021 jyly qazaqstandyq oqýshylar halyqaralyq olimpiadalardan 26 medal aldy (2020 jyly – 16).
Sonymen birge, sońǵy úsh jylda jeńimpaz atanǵan daryndy balalarǵa bilim berý grantyn taǵaiyndaý úshin olimpiadalar men jarystar tizbesine irikteý kriteriileri ázirlenýde.
«Sonymen qatar, halyqaralyq olimpiadalardyń altyn medal iegerine – 1500 ailyq eseptik kórsetkish, kúmis medal – 1000 AEK, qola medal iegerine 500 AEK mólsherinde birjolǵy syiaqy tóleý respýblikalyq biýdjet qarajaty esebinen josparlanýda. Sondai-aq, olardy daiyndaǵan pedagogterge birjolǵy syiaqy tólemderi mynadai mólsherde belgilenedi: altyn medal iegerin daiyndaǵan pedagogke – 150 AEK, kúmis medal – 100 AEK, qola medal – 50 AEK», - dedi komitet basshysy.
