Halyqaralyq azamattyq aviatsiia uiymy (ICAO) Ryanair reisiniń májbúrli túrde qonýy jáne Roman Protasevichtiń ustalý jaǵdailaryna qatysty tergeý júrgizedi, - dep habarlaidy Tengrinews.kz tilshisi Reuters-ke silteme jasap.
ICAO sheshimine Ulybritaniianyń syrtqy ister ministri Dominik Raab pen Irlandiia kólik ministri Imon Raian qoldaý bildirgen.
"Biz halyqaralyq quqyqtyń buzylýyna jáne Azamattyq aviatsiianyń printsipterine shabýyl jasaýǵa ákelgen barlyq jaǵdaidy anyqtaý úshin halyqaralyq seriktesterimizge qosylamyz", - delingen Raab málimdemesinde.
"Bul áreketter eýropalyq aviatsiia qaýipsizdigine shabýyl jáne EO-nyń eki astanasy arasynda saiahattap júrgen jolaýshylar men ekipaj músheleri ómirine qaýip tóndirdi", - dedi Raian.
IKAO 25 maýsymǵa deiin aralyq esep daiyndaidy, dedi Imon Raian. Tergeý Halyqaralyq aviatsiia erejeleriniń buzylǵanyn anyqtaýy kerek. Reuters óziniń aqparat kózderine silteme jasap, Resei men Qytai tergeýdi qoldaýdan bas tartqanyn aitty.
Eske salaiyq, 23 mamyrda kúndiz Ryanair áýe kompaniiasynyń Afinadan Vilniýske ushyp bara jatqan ushaǵy Minskide shuǵyl qonǵan. "Ushaq bomba qoiyldy degen habardan keiin qondyryldy", - delingen áýejai habarlamasynda. Keiin bul aqparat rastalmady.
Ushaq bortynda jýrnalist, Nexta telegram-arnasynyń burynǵy bas redaktory Roman Protasevich bolǵan. Nexta 2020 jylǵy tamyzda Belarýstegi prezidenttik sailaýdyń nátijeleri jariialanǵannan keiin jappai narazylyq kezinde oppozitsiianyń negizgi alańdarynyń biri boldy.
