Qazaqstan quramasy Halyqaralyq Armiia oiyndary sheńberinde ótkizilgen «Artilleriialyq atys sheberleri», «Suńqar salý» jáne «Senimdi qabyldaý» saiystarynda jeńis tuǵyrynan kórinip, altyndy qanjyǵaǵa bailady. Bul týraly QR Qorǵanys ministrliginiń baspasóz qyzmeti habarlaidy.
Qazaq sarbazdary «Artilleriialyq atys sheberleri» baiqaýynda alǵashqy altynyna qol jetkizdi. Jeke jarys, túngi sprint jáne estafeta kezeńderinen turatyn saiys kúndizgi jáne túngi ýaqytta ótti. Jarysqa qatysýshylar belgili bir baǵytty júrip ótip, pýlemet, avtomat jáne granata atqyshtan, sondai-aq minoatqyshtan oq atty. Túngi ýaqytta nysanany kózdeýge arnaiy quraldar paidalanyldy. Aqtyq estafetada elimizdiń mina atý boiynsha kórsetkishteri joǵary baǵalanyp, Qazaqstan quramasyna jeńis ákeldi.
Bul jeńis týraly «Ońtústik» óńirlik qolbasshylyǵy áskerleri qolbasshysynyń oq atý boiynsha orynbasary, komanda jattyqtyrýshysy, polkovnik Dáýren Esqojin: «Jeńiske birneshe ai boiy tynbai júrgizgen daiyndyq, komandanyń úilesimdi jumysy, myqty jaýyngerlik rýh, tabandylyq pen aiqyn maqsat jeteledi. Sondyqtan bul - qazaqstandyq artilleristerdiń eńbeginiń jeńisi», - deidi.
Úzdik nátije jetken kelesi baiqaýdyń biri – «Senimdi qabyldaý». Jarysta áskeri bailanys qyzmetkerleri radiogramma arqyly bailanysty ustap, Morze álippesimen habarlamalar jiberip, túnde jaryq berý belgilerin qalta shamy arqyly kórsetti. Al sońǵy márede saiyskerler kez kelgen tásilmen bailanysty ornatyp, qajetti dabyldy jiberýi tiis. Bul oraida bizdiń quram birinshi kezeńde-aq basymdyq tanytyp, saiystyń qalǵan kezeńderinde de úzdik kórindi.
Elimizge taǵy bir jeńisti syilaǵan – «Suńqar salý» baiqaýy. Bul úsh kezeńnen turatyn saiys. Birinshi kezeń – ushqyshsyz ushý aparattarynyń daiyndyǵy jáne kúndizgi áýe barlaýy, ekinshi kezeń – biiktep ushý, áýe barlaýy jáne túnde artilleriia oqtaryn qalypqa keltirý dep atalady. Mundaǵy sheshýshi kezeńde ár elden úsh ushqyshsyz ushý qurylǵylary alma-kezek izdeý, anyqtaý jáne nysandardyń koordinattaryn belgileý tapsyrmalaryn oryndady.
Aita keterligi, biyl elimizde ótken Halyqaralyq Armiia oiyndaryna Resei, Qytai, Belarýs, Ózbekstan, Qyrǵyzstan, Ázerbaijan, Tájikstan, Armeniia, Iran, Siriia, sonymen qatar Venesýela jáne Zimbabve memleketteri Qarýly Kúshteriniń áskeri sheberleri qatysty.
Atalǵan úsh baiqaýdyń jeńimpazdary men saiys júldegerlerin marapattaý 15 tamyz kúni «Otar» áskeri poligonynda ArHO-2019 saltanatty jabylý rásimi aiasynda ótedi.
