Qazaqstannyń jetekshi infektsionisi Dinagúl Baesheva qazaqstandyqtardy karantin sharalaryn saqtaýǵa shaqyrdy, dep habarlaidy QazAqparat.
«Bul – tolqyn emes, úrdistiń aǵymy ispettes. Adamdardyń ózi basqarady bul protsesti. Joq bolýy da, tyń qarqynmen údep ketýi de múmkin. Bir-birimizge virýsty qanshalyqty taratatynymyzǵa bailanysty. Máselen qatań sharalar qabyldanǵan, úiden shyǵarmaǵan kezeńdi alyp qaraiyq. Sol kezde virýstyń adamnan adamǵa taraityny kóp aityldy. Kóshede jyly ma, sýyq pa, aiaz ba, aptap ystyq pa – virýsqa báribir. Sebebi ol adam arqyly taraidy», - dedi Dinagúl Baesheva telefon arqyly QazAqparat tilshisine.
Ol mamyr aiynda TJ rejimi alynyp tastalyp, karantin engizilgenin eske saldy.
«Adamdar jaǵdaidy áli tolyq túsinbedi. Bálkim, bizdiń elde mundai indettiń buryn bolmaǵany da, mundai sharalardyń eshqashan qabyldanbaǵany da sebep bolǵan shyǵar. Al máselen Singapýr, Ońtústik Koreia sekildi elder SARS-ty da, MARS-ty da ótkergen. Bir aýyz sóz aitsa boldy, olar dárigerler men epidemiologtardyń keńesin buljytpai oryndaidy. Bizde halyqtyń jartysy shý kóterdi. Ashtan ólgenshe aýrýdan óleiik degender de bar. Qalǵany virýstyń joqtyǵyn aitysyp, memleket muny ádeii istep otyr dep áńgime taratty. Iaǵni árkim aýzyna kelgenin aitty. 1 maýsymda karantin men TJ rejimi alynyp tastalyp edi, bári kóshege shyǵyp, qoǵamdyq oryndardy aralap ketti», - deidi infektsionist.
Dinagúl Baeshevanyń sózinshe myńdaǵan adam bazarǵa shyǵyp, qydyryp ketken.
«Adamdar eshteńeni tyńdamady, aqparatty qabyldamady. Aqyry bir aptada ǵana naýqastar kúrt kóbeiip, aýrýdy aýyr kóteretinder de ósip ketti. Munyń bári – inkýbatsiialyq kezeńniń aiaqtalýynan boldy. Eshteńege senbei, bir-birimen bailanysta, qarym-qatynasta bolǵandar kóbeidi. Shara uiymdastyryp, adamdarmen bailanysty úzbegen sol adamdardyń birazy qazir aýyr kúide jatyr. Buryn qabyldanǵan sharalardyń bári bir sátte qirap, aýrýlardyń sany kúrt artyp ketti», - dedi Dinagúl Baesheva.
