«Ashyq dialog» suhbatynyń kezekti sany jariialandy. Suhbat barysynda QR Prezidenti Ákimshiligi Basshysynyń birinshi orynbasary Dáýren Abaev Memleket basshysynyń eki jylda atqarǵan jumystary týraly keńinen oi qozǵady, dep habarlaidy "Ult aqparat".
Dáýren Abaev Qasym-Jomart Toqaev úshin prezidenttiktiń alǵashqy eki jyly ońai bolmaǵanyn eske saldy.
«Bárinen buryn alǵashqy eki jyl Prezident Qasym-Jomart Kemeluly úshin kúrdeli synaqtarǵa toly boldy. Solardyń ishinde eń negizgisi – koronavirýs pandemiiasy. Álem endi ǵana jańa jaǵdaiǵa birtindep boi úiretip keledi. Biraq onyń ózi bárimizge aýyr tiip jatyr. Arystaǵy jaralys, Qordai oqiǵasy, Maqtaaraldaǵy tasqyn siiaqty elde bolǵan tótenshe jaǵdailardy da umytpaý kerek. Sondyqtan bárinen buryn Prezident osy eki jylda daǵdarys menedjeriniń rólin sátti oryndap shyqty deýge bolady. Oǵan eń bir qiyn kezderde qoǵamdy uiystyratyn kúrdeli ári batyl sheshimderdi jii qabyldaýǵa týra keldi», - dedi Prezident Ákimshiligi Basshysynyń birinshi orynbasary.
Onyń aitýynsha, táýelsiz Qazaqstan tarihyndaǵy ekinshi Preizdenttiń eń aishyqty ereksheligi «Halyq únine qulaq asatyn memleket» saiasatyn usynýy bolyp otyr.
«Toqaev prezidenttiginiń taǵy bir aishyqty ereksheligi – «Halyq únine qulaq asatyn memleket» tujyrymdamasyn engizýi. Bul – dál ýaqytynda qolǵa alynǵan jáne óte qajet tujyrym. Bul - jai ǵana printsip nemese ideia emes, bul – saiasat. Osy saiasatty memlekettik basqarýdyń túrli deńgeiinde baiaý ári durys túsiný bolyp jatyr. Bilesiz be, «Halyq únine qulaq asatyn memleketti» qoǵamdyq oi-pikirge baǵdarlanýmen shatastyrmaý mańyzdy. Eger solai bolǵanda qazir biz vaktsinalaý júrgizip jatpas edik, karantindik shekteýler engizbes edik jáne kóptegen qarapaiym sheshimder qabyldamas edik. Halyq únine qulaq asatyn memleket - qoǵamnyń shynaiy qajettiligin, azamattardyń kókeiin túsiný jáne sony barynsha tiimdi qanaǵattandyrý. Árine, halyqtyń suraýy ózgerip otyrýy múmkin», - dedi Dáýren Abaev memlekettiń qolynda sol ózgeristerdi bekitip otyratyn mańyzdy ári salmaqty qural bolýy keregin aita kele.
Sondai-aq, ol «halyq únine qulaq asatyn memleket» tujyrymdamasyna transformatsiialaný úrdisi eń birinshi Prezident ákimshiliginen bastalyp jatqanyn málim etti.
«Memlekettiń qolynda eldiń kókeiindegi ózgeristerdi bekitip otyratyn mańyzdy ári salmaqty qural bolýy kerek. Ol – azamattarmen kommýnikatsiia, áleýmettaný, sarapshylyq-taldaý jáne basqa da quraldar. Bilik organdarynda, ásirese Prezident ákimshiliginde osy komponentterdiń bári baiyppen kúsheitilip jatyr. Biz Memleket basshysynyń ideiasyn túsinýimiz kerek. Tek Halyq únine qulaq asatyn memleket qana ádiletti memleketke ainala alady. Al ádildik – Qasym-Jomart Toqaevtyń sailaýaldy baǵdarlamasyndaǵy negizgi taǵan», - dedi Abaev.
