Foto: Vladimir Tretiakov/AP
Májilis tóraǵasy Erlan Qoshanov Facebook paraqshasynda "Qandy qańtarǵa" qatysty pikir bildirip, erteń Májiliste Qańtar oqiǵasy boiynsha arnaiy tyńdaý ótetinin habarlady.
«Qańtar oqiǵasyna» týra bir jyl tolyp otyr. Bul jaǵdai elimiz úshin táýelsizdik jyldaryndaǵy eń aýyr synaq boldy.
Qańtardaǵy qaiǵyly oqiǵalardyń jarasy da, saldary da jeńil bolǵan joq. Sondyqtan halqymyz da, qoǵam da ol týraly jan jaqty ári ashyq aqparat alǵysy keledi. Memlekettiń ózi soǵan múddeli. Sebebi, Prezident aitqandai, halyqtan jasyratyn eshteńe bolmaýy tiis, qoǵam shyndyqqa kóz jetkizýi kerek.
Osy rette, Parlament Májilisi bolǵan oqiǵanyń mán-jaiyn, tergep-tekserý barysyn únemi baqylaýda ustap kele jatqanyn bilesizder. Ótken jyly memlekettik jáne quqyq qorǵaý organdarymen birge ashyq talqylaýlar ótkizdik. Sol talqylaýlar barysynda biraz máselege naqty jaýap berildi. Degenmen el arasynda Qańtarǵa qatysty áli de suraqtar jetkilikti. Ótken bir jyldyń ishinde qoǵamda túrli pikirler, qily qaýesetter taraýmen boldy.
Sondyqtan osy bir jyldyń ishinde júrgizilgen tergeý amaldarynyń nátijelerin ashyq jariialaý úshin, 2023 jylǵy 5 qańtarda Májilis qabyrǵasynda arnaiy tyńdaý ótedi. Tyńdaýda Bas prokýror men quqyq qorǵaý organdary basshylary esep beredi. Qoǵam belsendileri, BAQ ókilderi qatysady. Arnaiy otyrys respýblikalyq «Habar 24» telearnasynda jáne Májilistiń saitynda, áleýmettik jelilerdegi resmi paraqshalarynda tikelei efirde kórsetiledi» - dep jazdy Erlan Qoshanov.
