«Qazaqstan-2050» jalpyulttyq qozǵalysy azamattardyń ideialary men bastamalaryn qoldaýǵa arnalǵan crowd.kz2050.kz internet-portalyn iske qosty. Portal árbir azamattyń jergilikti ákimdikke óz jobalaryn usynýyna, talqylaýyna, pikir bildirýine múmkindik beredi, dep habarlaidy "Ult aqparat" qozǵalystyń baspasóz qyzmetine silteme jasap.
Jergilikti túrǵyndardyń qalany damytýǵa qatysýyn qamtamasyz etý úshin bul joba Batys Qazaqstan oblysynda ilki joba retinde qolǵa alyndy. Turǵyndar ideialaryn oblystyq ákimdik usynǵan internet resýrs arqyly joldai alady. Mundai joba osy ýaqytqa deiin álemniń iri qalalarynda qolǵa alynyp, óziniń tiimdiligin kórsetti.
Joba negizgi bes qadamnan turady:
1. Ákimdik belgili bir máseleni damytý nemese ózgertý týraly taqyrypty turǵyndardyń nazaryna usynady;
2. Taqyryp internet resýrsqa ornalastyrylady. Turǵyndar talqylaidy, pikir bildiredi;
3. Ákimdik kópshilikten qoldaý tapqan jobany jariialaidy;
4. Qoldaý tapqan jobany ákimdik qalai júzege asyryp jatqanyn habarlap otyrady;
5. Jobanyń qalai júzege asyrylǵanyn jáne qorytyndylary qalai bolǵany týraly infografika túrindegi esep jariialanady.
«Qazirgi ýaqytta kraýdsorsing tásili biznes, áleýmettik nemese qoǵamdyq máselelerdi sheshý quraly retinde tanylyp keledi. Sandyq tehnologiianyń múmkindikterin qoldaný arqyly problemalardy ońtailandyrýǵa arnalǵan joba azamattardyń talap-tilekterin qanaǵattandyrady degen oidamyz. Mundai tájiribe Resei, Finliandiia elderiniń birneshe kompaniialarynda qoldanylady. Aldaǵy ýaqytta jemisin beretini daýsyz», - deidi jobanyń jumys toby.
