Foto: Almaty.tv
Halyq pen áleýmettik mańyzy bar azyq-túlik óndirýshilerine arnalǵan tarif jyl sońyna deiin óspeidi. Bul týraly infliatsiiany tejeý máseleleri jónindegi kezekti jiynda aityldy.
Ulttyq ekonomika ministrligi tabiǵi monopoliialardy retteý komitetiniń tóraǵasy Timýr Qosymbaevtyń habarlaýynsha, biylǵa josparlanǵan kommýnaldyq tarifter baǵasyn kóterý jumystary aiaqtalǵan, al tabiǵi monopoliia sýbektilerinen jańa ótinimder kelip túsken joq.
"Sol sebepti, jyl sońyna deiin halyq pen jeńildigi bar tarif saiasaty qoldanylatyn áleýmettik mańyzy bar azyq-túlik óndirýshileri úshin tarif baǵasy óspeidi. Bul aqyly qyzmetterdiń qymbattaýynyń infliatsiiaǵa áserin azaitýǵa múmkindik beredi", - delingen habarlamada.
Óńirlerde jańa ónimge kelisimsharttar jasasý jumysy jedel qarqynmen júrgizilýde. Aýyl sharýashylyǵy vitse-ministri Erbol Tasjúrekovtiń málimetinshe, kartop, piiaz, sábiz jáne qyryqqabat jetkizýge arnalǵan kelisimsharttar 2025–2026 jyldardyń maýsymynda halyqtyń qajettiligin 50% qamtyp otyr.
Máselen, Atyraý, Almaty oblystary men Astana qalasynda piiazǵa degen suranys tolyǵymen jabylǵan. Qaraǵandy, Túrkistan, Abai, Aqmola oblystary men Almaty qalasynda da jumys qarqyndy. Biraq Aqtóbe oblysynda kókónistiń barlyq túri boiynsha kelisimsharttar jasasý deńgeii tómen.
Baqylaýdy kúsheitý maqsatynda Serik Jumanǵarin óńirlerge baryp, turaqtandyrý qorlaryndaǵy kólem men qordyń jetkilikti bolýyn tekseretin arnaiy jumys tobyn qurýdy tapsyrdy.
