QR Aqparat jáne qoǵamdyq damý ministri Aida Balaeva Qazaqstan musylmandary dini basqarmasy janyndaǵy «Halyq arna» telearnasynyń ashylýyna qatysty pikir bildirdi, dep habarlaidy "Ult aqparat".
«Búgin Qazaqstan musylmandary dini basqarmasy janyndaǵy «Halyq arna» telearnasynyń saltanatty ashylý rásimi ótti. Osy oraida, Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly men «Halyq arna» telearnasynyń ujymyn osy tarihi oqiǵamen shyn júrekten quttyqtaimyn! Qazirgi aqparattyq tehnologiialar ǵasyrynda zamanaýi tásilderdi paidalanyp, ony halyqqa jetkizý kezek kúttirmeitin úrdistiń biri bolýda. Qoǵamda adamzatty izgilik pen birlikke bastaýshy – ónegeli sóz bolsa, ony halyq nazaryna jetkizýshi – telearna. Qazaqstan halqyn, sonyń ishinde óskeleń urpaqty otansúigishtikke, izgilik pen adamgershilikke tárbieleýde telearnanyń mańyzy óte zor dep bilemin«, - dep jazdy ministr Facebook paraqshasynda.
Aida Balaeva «Halyq arna» telearnasy jastardyń boiynda zaiyrly memlekettiń qaǵidattaryna sai keletin dini sanany qalyptastyrý, sondai-aq teris dini aǵymdardyń arbaýynan qorǵaý maqsatynda qomaqty úles qosyp, dini-rýhani saladaǵy jetekshi arnalardyń biri bolady dep senetindigin bildiredi.
«Telarnada dástúrli dinmen qatar, mádeni tanymdyq baǵyttaǵy kórsetilimderge oryn berilgeni qalyń jurtshylyqty qýantady. Sebebi, tarihtan tálim alǵan jastarymyz ata-babalar ustanǵan dindi, san ǵasyrdan beri sabaqtasyp kele jatqan salt-dástúrlerin ardaqtap, erekshe qurmetteitin bolady. Osy rette, telearnanyń ujymyna shyǵarmashylyq tabystar tileimin. «Halyq arna» jaqsylyqtyń jarshysyna ainalsyn!», - dedi Aida Balaeva.
Buǵan deiin habarlaǵanymyzdai, búgin «Halyq arna» telearnasy ashyldy. Telearnaǵa qajetti kontentti jinaqtaý jumysy tolyq aiaqtalǵan. Dini baǵyttaǵy baǵdarlamalar, suhbattar, siýjetter men beine-rolikterdiń basym bóligi QMDB-nyń bas keńsesinde túsiriledi. Arnany «Otaý tv» men «Alma tv» kabeldik jelilerinen kórýge bolady.
