Májilis tóraǵasy Nurlan Nyǵmatýlin Biryńǵai jinaqtaýshy zeinetaqy qory basqarma tóraǵasy Janat Qurmanovty halyq aldyna shyǵyp, jetkilikti shektiń nege óskenin ýaqytynda túsindirmegeni úshin synap tastady, dep habarlaidy Sputnik Qazaqstan.
Májilis otyrysynda saqtandyrý naryǵy týraly zań jobasyn talqylaý kezinde depýtattar BJZQ basshysyna birlesken erli-zaiypty annýiteti týraly suraq qoidy. Alaida Janat Qurmanov qoiylǵan suraqqa naqty jaýap bere almady.
"Osy zańnyń jańa normalary ekinshi nusqany keńeitedi. Árine, ómirde ártúrli jaǵdai bolady, mysaly erli-zaiyptynyń biri qaitys bolýy múmkin nemese ajyrasady. Sondyqtan zań boiynsha osyndai máseleler sheshiledi. Shartqa qosymshada jeke tólem kestesi boiynsha osy máseleni sheshýge bolady", - dedi Qurmanov.
Osy kezde Nurlan Nyǵmatýlin odan "qalai sheshýge bolady?", - dep surady.
"Sheshýge bolady dep úshinshi ret aityp otyrsyz. Siz bir aidyń ishinde halyq aldyna shyǵyp, suraqtarǵa (jetkilikti shek jaily) nege jaýap bermegenińiz endi túsinikti boldy. Bir máselege jaýap bere almaisyz. Tikelei suraqqa sol jaqtan da, oń jaqtan da kiretin jol izdep tursyz. Depýtat tikelei surady ǵoi. Qalai basqaryp júrsiz, eger sony bilmeseńiz? Eki negizgi qadam jasaý kerek. Sony aita almai tursyz", - dep ursyp tastady spiker.
Nyǵmatýlin Qurmanovqa májiliske daiyndalyp kelý kerek ekenin eskertti.
Eske salsaq, 3 jeltoqsanda BJZQ zeinetaqy jinaǵyn merziminen buryn paidalanýdyń jetkilikti shegi ósetinin habarlady. Bul jańalyq qoǵamda daý týǵyzdy. Qazaqstandyqtar memlekettik organdardyń shekti mejeni halyqpen talqylamai, esh eskertýsiz 70%-ke deiin kóterip tastaǵanyna ashýlandy.
Keiin Prezident Qasym-Jomart Toqaev kópshiliktiń pikirine qulaq asyp, burynǵy mejeni kóterý merzimin kelesi jyldyń sáýirine deiin toqtatýdy tapsyrdy.
