مەجٸلٸس تٶراعاسى نۇرلان نىعماتۋلين بٸرىڭعاي جيناقتاۋشى زەينەتاقى قورى باسقارما تٶراعاسى جانات قۇرمانوۆتى حالىق الدىنا شىعىپ, جەتكٸلٸكتٸ شەكتٸڭ نەگە ٶسكەنٸن ۋاقىتىندا تٷسٸندٸرمەگەنٸ ٷشٸن سىناپ تاستادى, دەپ حابارلايدى Sputnik قازاقستان.
مەجٸلٸس وتىرىسىندا ساقتاندىرۋ نارىعى تۋرالى زاڭ جوباسىن تالقىلاۋ كەزٸندە دەپۋتاتتار بجزق باسشىسىنا بٸرلەسكەن ەرلٸ-زايىپتى اننۋيتەتٸ تۋرالى سۇراق قويدى. الايدا جانات قۇرمانوۆ قويىلعان سۇراققا ناقتى جاۋاپ بەرە المادى.
"وسى زاڭنىڭ جاڭا نورمالارى ەكٸنشٸ نۇسقانى كەڭەيتەدٸ. ەرينە, ٶمٸردە ەرتٷرلٸ جاعداي بولادى, مىسالى ەرلٸ-زايىپتىنىڭ بٸرٸ قايتىس بولۋى مٷمكٸن نەمەسە اجىراسادى. سوندىقتان زاڭ بويىنشا وسىنداي مەسەلەلەر شەشٸلەدٸ. شارتقا قوسىمشادا جەكە تٶلەم كەستەسٸ بويىنشا وسى مەسەلەنٸ شەشۋگە بولادى", - دەدٸ قۇرمانوۆ.
وسى كەزدە نۇرلان نىعماتۋلين ودان "قالاي شەشۋگە بولادى?", - دەپ سۇرادى.
"شەشۋگە بولادى دەپ ٷشٸنشٸ رەت ايتىپ وتىرسىز. سٸز بٸر ايدىڭ ٸشٸندە حالىق الدىنا شىعىپ, سۇراقتارعا (جەتكٸلٸكتٸ شەك جايلى) نەگە جاۋاپ بەرمەگەنٸڭٸز ەندٸ تٷسٸنٸكتٸ بولدى. بٸر مەسەلەگە جاۋاپ بەرە المايسىز. تٸكەلەي سۇراققا سول جاقتان دا, وڭ جاقتان دا كٸرەتٸن جول ٸزدەپ تۇرسىز. دەپۋتات تٸكەلەي سۇرادى عوي. قالاي باسقارىپ جٷرسٸز, ەگەر سونى بٸلمەسەڭٸز? ەكٸ نەگٸزگٸ قادام جاساۋ كەرەك. سونى ايتا الماي تۇرسىز", - دەپ ۇرسىپ تاستادى سپيكەر.
نىعماتۋلين قۇرمانوۆقا مەجٸلٸسكە دايىندالىپ كەلۋ كەرەك ەكەنٸن ەسكەرتتٸ.
ەسكە سالساق, 3 جەلتوقساندا بجزق زەينەتاقى جيناعىن مەرزٸمٸنەن بۇرىن پايدالانۋدىڭ جەتكٸلٸكتٸ شەگٸ ٶسەتٸنٸن حابارلادى. بۇل جاڭالىق قوعامدا داۋ تۋعىزدى. قازاقستاندىقتار مەملەكەتتٸك ورگانداردىڭ شەكتٸ مەجەنٸ حالىقپەن تالقىلاماي, ەش ەسكەرتۋسٸز 70%-كە دەيٸن كٶتەرٸپ تاستاعانىنا اشۋلاندى.
كەيٸن پرەزيدەنت قاسىم-جومارت توقاەۆ كٶپشٸلٸكتٸڭ پٸكٸرٸنە قۇلاق اسىپ, بۇرىنعى مەجەنٸ كٶتەرۋ مەرزٸمٸن كەلەسٸ جىلدىڭ سەۋٸرٸنە دەيٸن توقتاتۋدى تاپسىردى.
