Kómek týraly signal Qaraǵandy oblysynyń Tótenshe jaǵdailar departamentine 6 maýsymda tańerteń túsken. Qońyraý shalǵan er adam dosymen 3 maýsymda Priozersk qalasynan Qarajalǵa shyqqanyn aitqan. Jolda kólikteri buzylyp, ekeýi qalaǵa jaiaý qaitýǵa bel býǵan. Biraq adasyp qalǵan. Uialy bailanys bolmai, keiin telefondary óship qalǵan. Dala kezgen er adamdar júrgen jerinde qutqarýshylarǵa iz qaldyrǵan.
"Er adamdar birge 100 shaqyrymdai jol júrdi. Bireýi ábden sharshap, qaraýsyz qalǵan ǵimaratta qalýdy uiǵarǵan. Al ekinshisi ary qarai júrisin jalǵastyrǵan. 6 maýsymda tańerteń qaraýsyz qalǵan ǵimarattaǵy er adam az ýaqytqa qýaty bitken telefonyn qosyp, bizge habarlasyp úlgerdi. Ol óziniń shamamen ornalasqan jerin habarlap úlgerdi", - dedi Priozersk qalalyq Tótenshe jaǵdailar basqarmasynyń basshysy Maqsat Abiýrov.
Qutqarýshylar joǵalǵan er adamdardy jeti saǵattan keiin tapqan. Onyń serigi 15 shaqyrym jerden tabyldy.
"Izdeýge habarlanǵan koordinattardyń dál bolmaýy kedergi keltirdi. Bul aýmaqta qaraýsyz qalǵan ǵimarattar jii kezdesedi, árbir ǵimaratty tekserý óte uzaq ýaqytty alady. Er adam ot jaqqany durys bolǵan. Signaldy kórip, soǵan qarai júrdik. Ekeýi de sharshap, sýsyz, tamaqsyz kóp ýaqyt júrdi. Jol boiy bizge alǵys aitty, jylap, qýandy. Biz olarmen birge qýandyq", – deidi Maqsat Abiýrov.
Erlerdiń densaýlyǵy qanaǵattanarlyq, meditsinalyq kómek qajet emes. Qutqarýshylar alys jolǵa shyqqanda barlyq erejeni saqtaýǵa shaqyrdy.
"Jolǵa shyǵar aldynda kóliktiń jumysqa jaramdylyǵyn tekserip, týystaryna eskertip, qaitý ýaqytyn belgileńiz, bailanys quraldaryn ózińizben birge alyńyz, jol belgilerin qadaǵalańyz", - dep eskertti Priozersk qalalyq TJ bóliminiń basshysy Maqsat Abiýrov.
